جەزائیر.. خۆپیشاندان دژبە ئەنجامی هەڵبژاردنی سەرۆكایەتی

جەزائیر ــ AA

جارێكی دیكە هاووڵاتییانی جەزائیر دژبە ئەنجامی هەڵبژاردنی سەرۆكایەتی كە رۆژی پێنجشەممەی رابردوو بەڕێوەچوو، رژانە سەر شەقامەكان و خۆپیشاندانیان ئەنجامدا.

خۆپیشاندانەكان لە ژمارەیەك شار لەنێویاندا شاری جەزائیری پایتەخت ئەنجامدران كە لەمیانیدا خۆپیشاندەران داوایان كرد گۆڕانكاری ریشەیی لە سیستەمی بەڕێوەبردنی دەسەڵاتدا بكرێت، بەدەر لەوەش رایانگەیاند، ئەنجامی هەڵبژاردنی سەرۆكایەتی كە رۆژی پێنجشەممەی رابردوو بەڕێوەچوو، رەت دەكەنەوە.

هەر لەمیانی خۆپیشاندانەكاندا، دروشمەكانی"نا نا بۆ هەڵبژاردنی چەتەكان"، "خۆراگرین" و "كەسمان هەڵنەبژاردووە و كەسیش نوێنەرایەتیمان ناكات" كرنووش نابین" و "نا بۆ سەرۆكێك كە هێزی سەربازیی هێناویەتێ سەر دەسەڵات" بەرزكرانەوە.

خۆپیشاندانەكان دوای ئەوە ئەنجامدران كە دەستەی باڵای سەربەخۆی هەڵبژاردنەكانی جەزائیر سەركەوتنی سەرۆكوەزیرانی پێشووتر، عەبدولمەجید تەبوون-ی لە خولی یەكەمی هەڵبژاردنی سەرۆكایەتییدا راگەیاند.

رۆژی پێنجشەممەی رابردوو، هەڵبژاردنی سەرۆكایەتی جەزائر بەڕێوەچوو كە تیایدا عەبدولمەجید تەبوون بەدەستهێنانی ٥٨،١٥ لەسەدای دەنگەكان، سەركەوتنی بۆخۆی مسۆگەر كردووە.