Zana Natık Kerem
28 ئادار 2017•نوێکردنەوە: 29 ئادار 2017
كەركووك ــ AA
ئەنجوومەنی پارێزگای كەركووك بەزۆرینەی دەنگی ئەندامانی ئەنجوومەنەکە، بڕیاری هەڵكردنی ئاڵای كوردستانی لەسەر فەرمانگە حکوومییەکانی ئەو پارێزگایە پەسەند کرد.
ئەمڕۆ سێشەممە، ئەنجوومەنی پارێزگای كەركووك دانیشتنی ئاسایی خۆی ساز كرد كە ئەندامانی هەردوو لیستی عەرەبی و توركمانی بایكۆتی دانیشتنەكەیان كرد.
لەمیانی دانیشتنەكەدا، لە كۆی ٤١ ئەندامی ئەنجوومەنی پارێزگای كەركووك، ٢٦ ئەندام كە زۆربەیان كورد بوون دەنگیاندا لە بەرژەوەندی بڕیاری هەڵكردنی ئاڵای كوردستان لەسەر فەرمانگەکانی حكوومی لەو پارێزگایە.
هاوكات پارێزگاری كەركووك، نەجمەددین كەریم رێگای بە رۆژنامەوانان دا كە رووماڵی پڕۆسەی دەنگدان لەسەر بڕیاری هەڵكردنی ئاڵای كوردستان بكەن و دوای تەوابوونی پڕۆسەی دەنگدانەكە، لەنێو هۆڵی ئەنجوومەنی پارێزگای كەركووك ئاڵای كوردستان لەپاڵ ئاڵای عێراق هەڵكرا.
هەفتەی رابردوو لەسەر داوای ئەنجوومەنی پارێزگای كەركووك، پارێزگاری كەركووك، نەجمەددین كەریم بڕیاردا ئاڵای كوردستان لە پاڵ ئاڵای عێراق لەسەر سەرجەم فەرمانگەكانی حكوومی لەو پارێزگایە هەڵبکرێت كە ئەو بڕیارە كاردانەوەی لێكەوتەوە و پێكهاتەی توركمانی بڕیارەكەی رەتكردەوە.
