ئەفغانستان.. ھێرشێکی چەکداری حەوت کوژراوی لێکەوتەوە

کابول ــ AA

لە ئاکامی ھێرشێکی چەکداری بۆسەر ھێزە ئەمنییەکانی ئەفغانستان لە ویلایەتی سەرپول باکووری ئەو وڵاتە، حەوت کارمەندی ئەمنی کوژران.

ئاژانسی ھەواڵیی ئەسۆشەیتتد پرێس بڵاویکردەوە، سەرۆکی ئەنجوومەنی ویلایەتی سەرپول، محەمەد نور رەحمانی لە لێدوانێکدا رۆژنامەوانییدا رایگەیاند کە ھێرشەکە دەرنگانی شەوی رابردوو لە لایەن گرووپێکی چەکداری نەناسراوەوە کراوەتە سەر ھێزێکی ئەمنی کە ئەرکی پاراستنی بیرە نەوتییەکان بووە لە نزیک ناوەندی ویلایەت.

بە گوتەی محەمەد نور رەحمانی لە ئاکامی ھێرشەکەدا، حەوت کارمەندی ئەمنی کوژراون و پێنجی دیکەش برینداربوون.

تا ئێستا ھیچ لایەنێک بەرپرسیاریەتی خۆی لە ئەنجامدانی ھێرشەکەدا رانەگەیاندووە.