"ئه‌وه‌ی هه‌ڕه‌شه‌ له‌ كوردستان بكات چاره‌نووسی له‌ داعش باشتر نابێت"

هه‌ولێر - AA
وه‌یسی ده‌ڵێت "خه‌ڵكی كوردستان ده‌یه‌وێت به‌ رێگه‌یه‌كی دیموكراسی له‌ عێراق جیاببێته‌وه‌".

فه‌رمانده‌ی فه‌رمانده‌یی هێزه‌كانی زێره‌ڤانی، لیوا عه‌زیز وه‌یسی له‌ لێدوانێكدا بۆ ئاژانسی ئانادۆڵو له‌باره‌ی بوونی هه‌ڕه‌شه‌ی سه‌ربازیی له‌ لایه‌ن گرووپه‌كانی ناوخۆی عێراق به‌ تایبه‌ت له‌سه‌ر كوردستان و پڕۆسه‌ی راپرسی كه‌ بڕیاره‌ له‌ 25ی ئه‌م مانگه‌ ئه‌نجامبدرێت رایگه‌یاند "كوردستانییان شه‌ڕ ناخوازن، ده‌یانه‌وێت به‌ رێگه‌یه‌كی زۆر شارستانی و دیموكراسی مافی خۆمان به‌ده‌ست بهێنین، به‌ڵام ئه‌گه‌ر كه‌سێك بیه‌وێت ده‌ستدرێژی بكاته‌ سه‌ر كودستان، بێ گومان پێشمه‌رگه‌ی كوردستان ده‌ستی ده‌بڕێت".

له‌باره‌ی رووداوه‌كانی مه‌نده‌لییه‌وه‌ كه‌ گرووپێكی چه‌كداری حه‌شدی شه‌عبی به‌زه‌بری چه‌ك دوو به‌رپرسی كوردییان له‌و ناحیه‌ی پارێزگای دیاله‌ له‌سه‌ر كار دوورخسته‌وه‌ و ئاڵای كوردستانیان له‌سه‌ر باڵه‌خانه‌ی ئه‌نجوومه‌نی ناحییه‌كه‌ داگرت، عه‌زیز وه‌یسی بۆ ئاژانسی ئانادۆڵو گوتی: "ئێمه‌ زۆر دڵگرانیین له‌و رووداوانه‌، ئومێد ده‌خوازیین زۆر ته‌شه‌نه‌ نه‌كات، داواكاریی ئێمه‌ ئه‌وه‌یه‌ ئه‌و لایه‌نانه‌ به‌خۆیاندا بچنه‌وه‌، ئێمه‌ تا ئێستا له‌ ده‌وڵه‌تێكداین هیچ خێرمان لێ نه‌بینیوه‌، له‌سه‌ر ئێمه‌ سه‌پێنرابوو له‌گه‌ڵ عێراق بین، ئه‌مڕۆ ئێمه‌ ده‌خوازیین به‌ رێگه‌یه‌كی دیموكراسی له‌یه‌كتر جیاببینه‌وه‌ و ببینه‌ دوو دراوسێی باش، ئه‌وه‌ مافێكی سروشتی گه‌لی كورد و خه‌ڵكی كوردستانه‌، ده‌مانه‌وێت له‌ وڵاتی خۆمان چاره‌نووسی خۆمان دیاری بكه‌ین".

عه‌زیز وه‌یسی به‌دووریشی زانی حه‌شدی شه‌عبی بتوانێت گرفت و هه‌ڕه‌شه‌ له‌سه‌ر كه‌ركووك دروست بكات.

له‌باره‌ی مانه‌وه‌ی پێشمه‌رگه‌ له‌و ناوچانه‌ی له‌داعش پاكیان كردووه‌ته‌وه‌ ناوبراو گوتی: "هه‌ر شوێنێك بڕیاری سیاسیی له‌باره‌وه‌ هه‌بێت بۆ ئه‌وه‌ی پێشمه‌رگه‌ی تیادا بمێنێته‌وه‌، پێشمه‌رگه‌ له‌و شوێنانه‌ ده‌مێنێته‌وه‌، ئێمه‌ وا په‌روه‌رده‌ كراوین تا كه‌سێك هێرش نه‌كاته‌ سه‌رمان وه‌ڵامی ناده‌ینه‌وه‌، كه‌سێك دوژمنایه‌تی ئێمه‌ نه‌كات وه‌ڵامی ناده‌ینه‌وه‌".

گوتیشی: "ده‌مانه‌وێت كێشه‌كان به‌ برایه‌تی و ئاشتی چاره‌سه‌ر بكه‌ین، به‌ڵام ئه‌گه‌ر به‌ چاوسووركردنه‌وه‌ و به‌ خۆسه‌پاندن ئیراده‌ی خۆی به‌سه‌ر ئێمه‌دا بسه‌پێنێت، ئه‌وكات پێشمه‌رگه‌ی كوردستان خۆی و كوردستان له‌و هه‌ڕه‌شانه‌ ده‌پارێزێت، ئه‌وه‌شی بیه‌وێت هێرش و هه‌ڕه‌شه‌مان بكاته‌ سه‌ر چاره‌نووسی له‌ داعش باشتر نابێت".