سلێمانی.. پێنجەمین كۆنفرانسی ساڵانەی ناڕێكی زگماگی مەڵاشوو و لێو

سلێمانی - AA
وەزیری تەندروستی حكوومەتی هەرێمی كوردستان، رێكەوت محەمەد لە بارەی كۆنفرانسەكەوە لە لێدوانێكی رۆژنامەوانیدا گوتی: "ئەم كۆنفرانسە یەكێكە لەو دەستكەوتە زانستیانەی بەڕێوەبەرایەتی تەندروستی سلێمانی كە شان بەشانی قەیرانی دارایی و ئەو دۆخە سەختەی بەسەر هەرێمی كوردستان هاتووە، بەڵام ئەم كۆنفرانسانە لە سلێمانی و شارەكانی تر بەردەوامی هەیە و پێشتریش چەند كۆنفرانسێكی تر ئەنجامدراوە".
ئەو گوتی: "ئەم كۆنفرانسە دەربارەی نەخۆشی ناڕێكی زگماگی مەڵاشوو و لێوی منداڵانە كە سەرەڕای ئەوەی دەبێتە هۆی تێكچونی رووخساری منداڵەكە، چەند ماكی لەسەر گوێ‌ و قسەی منداڵەكە و چوونی بۆ ناو كۆمەڵگە هەیە، بۆیە بەسوپاسەوە سەنتەری ئیمیرجنسی و جوانكاری بیری لەم كۆنفرانسە كردووەتەوە كە نەخۆشییەكی منداڵانە و چارەسەریشی زەحمەتە، تێیدا چەند پزیشكێكی پسپۆڕی بەریتانی بەشدارن و بۆ ماوەیەك ئەو نەشتەرگەرییە ئەنجام دەدەن لە كوردستان".

وەزیری تەندروستی ئاماژەی كرد بەوەی لە كۆنفرانسەكەدا تەواوی زانستە تازەكانی بوارەكە پێشكەش بە پزیشكە بەشداربووەكان دەكرێت.

لەلای خۆیەوە بەڕێوەبەری فەرمانگەی تەندروستی سلێمانی، میران محەمەد رایگەیاند لە هەرێمی كوردستان نزیكەی 200 منداڵ تۆماركراوە كە ئەو نەخۆشییەی هەبووە، بەڵام بەهەوڵی پزیشكە پسپۆڕەكان دەست بە چارەسەركردنیان كراوە و لە سەنتەری سۆمەرلاند لە سلێمانی 86 منداڵ نەشتەرگەرییان بۆ كراوە.

ئەو ئاماژەی كرد بەوەی بەهۆی پێشكەوتنی جیهان و زیاد بوونی تەكنەلۆجیا و پیشەسازییەوە، ژینگە بەرەو پیسبوونی زیاتر دەڕوات و رێژەی نەخۆشییەكانیش زیادیان كردووە.