یەکەم تیمی هاوکاریی چین بەرەو تورکیا بەڕێ کەوت

پەکین – AA

چین بە مەبەستی پشتیوانی لە کارەکانی گەڕان و رزگارکردن دوای ئەو دوو بوومەلەرزەیەی دوێنێ بە گوڕی ٧،٧ و ٧،٦ پلە لە پارێزگای مەڕەش روویان دا و ١٠ پارێزگای تورکیایان گرتەوە، تیمی هاوکاریی مەدەنی رەوانەی تورکیا کرد.

Global Times بڵاوی کردەوە تیمێکی هەشت کەسی سەر بە Ramunion کە دامەزراوەی گەڕان و رزگارکردنە لەگەڵ راداری رزگارکردن، ئامرازە کونکردن و بڕینی سەقفی داروپەردووی داڕووخاو و سەگێکی پۆلیسی بە تایبەت راهێندراو لە چینەوە بەرەو تورکیا بەڕێ کەوتوون.

لە هەواڵەکەدا ئاماژە بەوە دراوە کە چاوەڕێ دەکرێت نیوەڕۆی سبەی تیمەکە کە خاوەن ئەزموونێکی زۆری گەڕان و رزگارکردنی نیشتمانی و نێودەوڵەتییە بگاتە ناوچە زیانبەرکەوتووەکان.

- هاوکاریکردن بە بەهای پێنج ملیۆن و ٨٠٠ هەزار دۆلار

لای خۆیەوە جێگری سەرۆکی ئاژانسی چین بۆ هەماهەنگی گەشەپێدانی نێودەوڵەتی (CIDCA)، دینگ بۆکینگ رایگەیاند کە حکوومەتی وڵاتەکەی لە رێگای ئاژانسەکەوە بە بەهای ٤٠ ملیۆن رنمینبی (پێنج ملیۆن و ٨٠٠ هەزار دۆلار ) هاوکاری مرۆیی بۆ تورکیا دابین دەکات.

مانگی سووری چینیش رایگەیاندووە کە بە بەهای ٢٠٠ هەزار هاوکاری مرۆیی لەناکاو بۆ مانگی سووری تورکیا رەوانە دەکات.