یڵدرم به‌ره‌و ئیسپانیا به‌ڕێ كه‌وت

ئه‌نقه‌ره‌ - AA

به‌ر له‌ به‌ڕێكه‌وتنی به‌ره‌و ئیسپانیا سه‌رۆكوه‌زیرانی توركیا بینالی یڵدرم له‌ فڕۆكه‌خانه‌ی ئه‌سه‌نبۆغا كۆنگره‌یه‌كی رۆژنامه‌وانی ساز دا.

یڵدرم كه‌ ژماره‌یه‌ك له‌ وه‌زیر و جێگری وه‌زیران یاوه‌ری ده‌كه‌ن، ئاماژه‌ی به‌وه‌ دا له‌ سه‌ر بانگهێشتی فه‌رمی سه‌رۆكوه‌زیرانی ئیپسانیا ماریانۆ راجۆی و به‌مه‌به‌ستی به‌شداریكردن له‌ كۆبوونه‌وه‌ی لوتكه‌ی هه‌ردوو حكوومه‌تی توركیا-ئیسپانیا سه‌ردانی ئه‌و وڵاته‌ ده‌كات.

سه‌رۆكوه‌زیرانی توركیا بینالی یڵدرم تیشكی خسته‌ سه‌ر ئه‌وه‌ی له‌ میانی سه‌ردانه‌كه‌یدا له‌گه‌ڵ هاوتا ئیسپانیه‌كه‌ی تاوتوێی په‌یوه‌ندییه‌كانی ئێستا و ئایینده‌ی هه‌ردوو وڵات ده‌كه‌ن. سه‌رنجی بۆ ئه‌وه‌ش راكێشا كه‌ له‌گه‌ڵ پاشای ئیسپانیا فلیپی شه‌شه‌م و سه‌رۆكی په‌رله‌مانی ئیسپانیا ئانا پاستۆر كۆده‌بێته‌وه‌. هه‌روه‌ها له‌ كۆڕبه‌ندی ئابووری نوه‌ڤا كه‌ دامه‌زراوه‌یه‌كی هزری به‌ناوبانگی ئیسپانییه‌ گوتارێك پێشكه‌ش به‌ ئاماده‌بووان ده‌كات و هه‌ڤپه‌یڤین له‌گه‌ڵ میدیاكانی ئه‌و وڵاته‌ ئه‌نجام ده‌دات.

یڵدرم ئاماژه‌ی به‌وه‌ دا كه‌ به‌هۆی كێشه‌كانی سووریاوه‌ سیسته‌می به‌رگری ئاسمانی توركیایان له‌ ئیسپانیا ئه‌كتیڤ كردووه‌، گوتی: "دوو ساڵه‌ ئیسپانیا مووشه‌كه‌كانی به‌رگری ئاسمانی له‌ توركیا جێگیر كردووه‌. له‌به‌رئه‌وه‌ی ئیسپانیا هاوپه‌یمان و دۆستی راسته‌قینه‌ی توركیایه‌. وڵاتێكی ئه‌ندامه‌ له‌ یه‌كێتیی ئه‌ورووپا. ئه‌م سه‌ردانه‌ به‌ گرنگ ده‌زانین بۆ پته‌وتركردنی په‌یوه‌ندییه‌كانمان و به‌مهۆیه‌یشیه‌وه‌ ژماره‌یه‌ك رێككه‌وتننامه‌ واژوو ده‌كه‌ین. له‌ میانی ئه‌م دیدار و كۆبوونه‌وانه‌ هاوڕێ وه‌زیره‌كانیشمان ده‌رفه‌تی ئه‌وه‌یان بۆ ده‌ڕه‌خسێ له‌گه‌ڵ هاوتاكانیان له‌باره‌ی بابه‌ته‌كان به‌ تێروته‌سه‌لی بدوێن".

له‌باره‌ی بوومه‌له‌رزه‌كه‌ی شه‌وی دوێنێی شارۆچكه‌ی سامسات-ی پارێزگای ئادیامانیش سه‌رۆكوه‌زیرانی توركیا بینالی یڵدرم، گوتی: "به‌م هۆیه‌وه‌ هیوای سه‌لامه‌تی بۆ خه‌ڵكی ناوچه‌كه‌ و هاووڵاتییانمان ده‌خوازم. جێگای خۆشحاڵییه‌ كه‌ كه‌س نه‌بۆته‌ قوربانی. زیان به‌ر ژماره‌یه‌ك بینا كه‌وتووه‌ سه‌رۆكایه‌تی وه‌زیران له‌مباره‌یه‌وه‌ ده‌ستی كردووه‌ به‌كار بۆ ده‌ستنیشانكردنینیان و قه‌ره‌بووكردنه‌وه‌ی زیانبه‌ركه‌وتووان".