کۆبوونەوەی ئەردۆغان و ترەمپ لەگەڵ ژمارەیەک سیناتۆری ئەمریکی

واشنتۆن- AA

سەرکۆماری تورکیا، رەجەب تەیب ئەردۆغان رایگەیاند: "ئەوانەی ئێوە بە کورد ناویان دەبەن، پەیەدە/یەپەگەن. ئەمانە رێکخراوی تیرۆریستیین، ئەمانە لقی لاوەکیی پەکەکەن".

رەجەب تەیب ئەردۆغان و دۆناڵد ترەمپ دوای کۆبوونەوەی دووقۆڵیی و کۆبوونەوەی نێوان شاندەکان، لە ئۆڤڵ ئۆفیس لەگەڵ ژمارەیەک لە سیناتۆرەکان کۆبوونەوە.

ئەردۆغان لە گوتەیەکدا باسی لەوەکرد، کۆبوونەوەی زۆر بەسوودیان ئەنجامداوە و دەرفەتی ئەوەیان ھەبووە بەجوانترین شێوە تاوتوێی پەیوەندییەکان لەگەڵ ئەمریکادا کە ھاوپەیمانیی ستراتیژیی تورکیایە بکەن و رایگەیاند: "تواناکانمان لەسەر ئامانجی ١٠٠ ملیار دۆلاریی چڕکردووەتەوە".

سەرکۆماری تورکیا تیشکی خستەسەر ھاوبەشیی ستراتیژیی نێوان ئەنقەرە و واشنتۆن لە چوارچێوەی ناتۆدا و بە گرنگییەوە باسی لە کۆبوونەوەی لووتکەی ناتۆ کرد کە بڕیارە لە کانوونی یەکەمی ئەمساڵدا لە لەندەن بەڕێوەبچێت.

رەجەب تەیب ئەردۆغان رایگەیاند: "وەک دەزانرێت لە ناتۆدا تورکیا لە ریزبەندیی یەکەم پێنج وڵاتەکاندا ئەرکەکانی بەجێگەیاندووە. لەوبارەیەوە دۆخی ئێمە لەگەڵ ئەمریکادا مایەی مشتومڕ نییە. باوەڕم وایە لووتکەی لەندەن زۆر زۆر پڕ جووڵە دەبێت".

لە وەڵامی پرسیاری سیناتۆرێکدا، ئەردۆغان رایگەیاند: "کوردەکان ھاوکات ھاووڵاتیی منن. ئەو شوێنەی زۆرترین کوردی لێ دەژی وڵاتەکەی منە. لە ئێستادا لە پەرلەمان پارتەکەی من نزیکەی ٥٠ پەرلەمانتاری کوردی ھەیە. لەوانەی دیکەدا شتێکی لەم شێوەیە نییە. بەتایبەت لە ناوچەی باشووری خۆرھەڵات و ئانادۆڵوی خۆرھەڵات، بە مانای ئێجگار جددیی ئەو پارتەی کە فراوانترین رێکخستنی سیاسیی ھەیە پارتەکەی منە".

ھەروەھا گوتی: "ئەو وەبەرھێنانەی کە لەو ناوچانە کردوومانە تەنھا لە شوێنی خۆیان دەتوانن بیانبینن و لێیان تێبگەن"، راشیگەیاند: "ژمارەی ئەو کوردانەی کە لە سەردەمی بەڕێز ئۆبامادا پەنایان بۆ وڵاتەکەم ھێنا، ٣٥٠-٣٦٠ ھەزارە. لە کاتێکدا ئەمانە کە ھیچ کەس وەرینەدەگرتن، ئێمە وەرمانگرتن".

ئەو لەو بارەیەوە زیاتر گوتی:"جلوبەرگ، خواردن، تەندرووستی و دۆخی پەروەردەیان ھەمووی لەسەر ئێمەیە. ھاوکاری ھیچ کەسێک بۆ ئەمانە جێگەی باس نییە. بەڵام ئەوەی کە ئێوە بە "کورد" لەقەڵەمی دەدەن پەیەدە/ یەپەگەیە، ئەمانە رێکخراوی تیرۆریستین (پەیەدە/ یەپەگەیە)، ئەمانە دەزگای هاوشانی پەکەکەن. من بە تایبەتی دەمەوێ ھەندێک بەڵگەتان پێبدەم. لە راستیدا ئەم فەرھاد عەبدی شاھینە کوڕی مەعنەوی سەردەستەی رێکخراوی تیرۆریستی جوداخواز "ئاپۆ"یە. پێویستە ئەمە بزانرێ. ھەروەک بۆ بەڕێز سەرۆک ئاماژەم پێ کرد، ئەوا ھەمان شتم لە سەردەمی بەڕێز ئۆباماش ئاماژە پێکردبوو. پێویستە ئێمە ناوچەی ئارام دروست بکەین".

ئەردۆغان گوتیشی: "لە کۆبوونەوەی لایەنەکانی نێودەوڵەتیی، لە ئێستادا لە باکووری سووریا دەتوانین ئاماژە بە ناوچەیەکی ئارام بە درێژای ٤٤٤ کیلۆمەتر و قوڵایی ٣٢ کیلۆمەتر، ھەروەک بەڕێز سەرۆک بە "٢٠ میل" ئاماژەی پێکرد، دروستکراوە. لەماوەی شەش مانگ بۆ دوو ساڵ، دەتوانین یەک ملیۆن پەناخواز لە ناوچەی ئارام نیشتەجێ بکەین. دەتوانین یەک ملیۆن پەناخوازیش لە ناوچەی رەققە و دێرازۆر نیشتەجێ بکەین".