ژمارەی بریندارانی بوومەلەرزەکەی دوزجە بۆ ۳٥ کەس بەرزبووەوە

دوزجە - AA

لە قەزای گۆلیاکا سەربە پارێزگای دوزجە، بوومەلەرزەیەک بەگوڕی ٥،۹ روویدا و تا ئێستا ژمارەی بریندارانی بوومەلەرزەکە گەیشتووەتە ۳٥ كەس.

بوومەلەرزەکە لە پارێزگاکانی دەوروبەری دوزجەش هەستی پێ کرا و تا ئێستاش چارەسەری بریندارەکان، بەردەوامە.

بەگوێرەی ئەو زانیارییانەی لە بەڕێوبەرایەتی تەندروستی شارەکەوە وەرگیراون، ژمارەی بریندارانی بوومەلەرزەکە لە ۳۲ كەسەوە بۆ ۳٥ کەس بەرزبووەتەوە و دۆخی یەکێک لە بریندارەکانیش ناجێگیرە.

ئەوەش خراوەتەڕوو کە هۆکاری برینداربوونی ئەو کەسانە بەهۆی خۆهەڵدان و کەوتنەوە بووە.

لە لایەکی دیکەشەوە پاشلەرزەکان بەردەوام بوون و بەهۆی بوومەلەرزەکەشەوە یەک شوێنکار رووخاوە و حەوت بۆ هەشت بیناش کە بینای دادگای دوزجە یەکێکیانە، زیانیان بەرکەوتوە.

لە کاتێکدا تیمی ئاژانسی ئانادۆڵو، رووماڵی بینا زیانلێکەوتووەکانی دەکرد لە پەخشی راستەوخۆدا، پاشلەرزە روویدا و پەیامنێرەکان بەخێرایی لە ناوچەکە دوور کەوتنەوە.

هەر لە کاتی پەخشی راستەوخۆدا، ئەوە بەدی کرا کە بەشێکی هاووڵاتییان لەترسی بوومەلەرزە ترساون بچنە ناو ماڵەکانیان و لە دەرەوە ماونەتەوە.

تیمەکانی مانگی سووری تورکی و سەرۆکایەتی ئیدارەدانی کارەسات و باری لەناکاو (AFAD) لە چەند شوێنێکی شارەکە، ئاگریان بۆ ئەو هاووڵاتییانە کردەووە کە لە دەرەوەی ماڵەکانیان مابوونەوە.