لە چوارچێوەی ئۆپەراسیۆنی بازنە-١٧دا دوو هەزار و ٧٥٦ تۆمەتبار دەستگیر کران

ئەنقەرە - AA

وەزیری ناوخۆی تورکیا عەلی یەرلیکایا ڕاگەیاند، لە سەرانسەری تورکیا ئۆپەراسیۆنێکی هاوبەش بۆ دەستگیرکردنی ئەو کەسانە دەستی پێکرد کە داواکراو بوون و لەو چوارچێوەیەدا دوو هەزار و ٧٥٦ کەس دەستگیر کران.

لە ڕاگەیەندراوێکدا کە لە هەژماری خۆی لە تۆڕەکانی کۆمەڵایەتی بڵاویکردووەتەوە، یەرلیکایا باسی لە بەڕێوەچوونی ئۆپەراسیۆنی بازنە-١٧ کردووە بۆ دۆزینەوەی ئەو کەسانەی کە داواکراو بوون.

لە ڕاگەیەندراوەکەدا هاتووە: "لە ماوەی چوار ڕۆژی ڕابردوودا لە چوارچێوەی ئۆپەراسیۆنی بازنە-١٧ کە هاوکات لە ٨١ پارێزگا بەڕێوەچوو، دوو هەزار و ٧٥٦ کەس دەستگیر کران کە بە تۆمەتی جۆراوجۆر وەک دزی، ساختەکاری، دەستدرێژی، ماددەی هۆشبەر و تیرۆر و تاوانە ڕێکخراوەییەکان داواکراو بوون".