لێدوانی پنتاگۆن لەبارەی فڕۆکەی ئێف-٣٥

واشنتۆن - AA

گوتەبێژی وەزارەتی بەرگری ئەمریکا، رۆب مانینگ رایگەیاند کە فڕۆکەوانانی فڕۆکەی ئێف-٣٥ی تورکی و کارمەندی چاودێری و چاککردنەوە لە ماوەیەکی کەمدا دەست بە راھێنانی فڕین لە ئەریزۆنا دەکەن و راشیگەیاند کە تا ئێستا ئیدارەی واشنتۆن ھیچ بڕیارێکی لەبارەی بەشداریکردنی تورکیا لە پرۆگرامی ئێف-٣٥ نەداوە.

مانینگ لە کۆنگرەی رۆژنامەوانی ھەفتانەی خۆی ھەڵسەنگاندنی بۆ پرسەکانی رۆژەڤ کرد و گوتی: "ھەروەکو دەزانین یەکەمین فڕۆکەی ئێف-٣٥ی تورکیا گەیشتووەتە بنکەی ئاسمانی ئەریزۆنا . ھاوکات فڕۆکەوانە تورکەکان و دەستەی چاودێری و چاککردنەوە گەیشتوونەتە بنکەی ئاسمانی لوکە، لەماوەیەکی کورتدا دەست بە ئاکادیمیای فڕین دەکەن".

مانینگ راشیگەیاند کە لە چوارچێوەی ئەو رێککەوتنانەی ئەنجامدراوە، فڕۆکەکە بۆ ماوەیەک لە ژێر چاودێری ئەمریکا دەبێت و ئەم قۆناغەش پەیوەستە بە تەواوکردنی راھێنانی ئەو فڕۆکەوانانەی کە فڕۆکەکە لێ دەخوِرن. تێکرای ئەمەش ساڵێک یان دوو ساڵە".

مانینگ باسی لە رێگرییەکانی ئەندامانی کۆنگرێسی ئەمریکا لەمەڕ پێدانی فڕۆکەی ئێف-٣٥ بە تورکیا کرد و گوتی: "ئیدارەی واشنتۆن ھیچ بڕیارێکی لەبارەی بەشداریکردنی تورکیا لە پرۆگرامی ئێف-٣٥ نەداوە. تورکیا ھاوپەیمانێکی گرنگی ناتۆیە و لە ساڵی ٢٠٠٢وە بەشداری لە پرۆگرامی ئێف -٣٥ی نێودەوڵەتی کردووە".

گوتەبێژی بەشی پرۆگرامە ھاوبەشەکانی پنتاگۆن، مایک ئەندرێو ھەر لە کۆنگرە رۆژنامەنووسییەکە لێدوانی پێشکەش کرد و رایگەیاند کە فڕۆکەوانە تورکەکان دەتوانن لە ماوەی یەک یان دوو مانگ دەست فڕاندنی فڕۆکەکان بکەن.