قەیسەری
جێگری سەرۆكوەزیرانی توركیا نومان كورتوڵموش لە میانی بەشداریكردنی لە كۆبوونەوەیەكی میدیای هەرێمیدا گوتارێكی پێشكەش كرد و گوتی: "ئەگەر بارودۆخی توركیا لەگەڵ وڵاتانی دراوسێدا هەڵبسەنگێنین ئەوا بۆمان دەردەكەوێ كە توركیا لە شوێن و جێگایەكی زۆر باشدایە و بارودۆخی توركیایش بارودۆخێكی باشە، ئەو قۆناغەی كە ئێستا توركیا تیایدایە وایكردووە كە توركیا نەتەنیا سەرقاڵی ئارامی سیاسی بێ بەڵكو هاوكات لە سایەی ئەو قۆناغەدا هەوڵ بۆ چارەسەر كردنی پرسی كورد یا پرسی رۆژهەڵات، چە ناوێكی لێ دەنین بنێن، دەدا كە گەورەترین و خوێناویترین پرسی مێژووی كۆماری توركیایە و بۆ چارەسەر كردنی ئەو پرسە توركیا ئیرادەیەكی یەكجار بەهێزی نیشان داوە".كورتوڵموش گوتی: "لە توركیا پێشتریش ئەو ئیرادەیە نیشان دراوە، من یەك لەو كەسانەم كە دەزانم تورگوت ئۆزاڵ و ئەربەكان لە سەردەمی دەسەڵاتی خۆیاندا بۆ چارەسەر كردنی ئەو پرسە چ جۆرە هەوڵێكیان داوە، بەڵام بەداخەوە لە توركیای رابردوودا هێز و ناوەندە شاراوەكان بە هیچ شێوەیەك دەرفەتیان بە ئاشتییەكی بەو جۆرە نەدەدا بۆیە دەسەڵاتەكانی ئەو كاتە بۆ چارەسەر كردنی پرسی كورد نەیانتوانی یەك هەنگاو بنن. ئەو سەردەمانە بەداخەوە لە بەرچاوی رای گشتی توركیا خاوەن دەسەڵاتێكی سیاسی بوو بەڵام لە پشتەوە بروكراسی و ئۆلیگارشی هەبوو كە مۆڵەتیان بە سیاسەتی مەدەنیش نەدەدا، ئەمانە هەموویان راستی توركیا بوون بەڵام سوپاس بۆ خوا كە دەسەڵاتی سیاسی ئەمڕۆی توركیا توانیویەتی بۆ چارەسەر كردنی ئەو پرسە هەنگاوی پێویست بنێ".
جێگری سەرۆكوەزیرانی توركیا لە بارەی ئاڵۆزییەكانی رۆژهەڵاتی ناڤین بە بەراوەرد بە بارودۆخی سیاسی توركیا گوتی: "سوریا هەنوكە دابەش كراوە و لە عێراقیش لە كاتێكدا كە دەسەڵاتێكی كارا لە ئارادا نییە بەڵام توركیا سەرەڕای پاراستنی ئاشتی و ئاسایشی ناوخۆیی خۆی هاوكات لە رێگای چارەسەر كردنی گەورەترین و مەترسیدارترین پرسی خۆیدا هەنگاوی گەورەی ناوە. بێگۆمان كاتێك دەست بەو هەوڵدانانە كرا بەشێكی زۆری رای گشتی توركیا پشتگیری خۆی بۆ ئەو هەوڵانە دەربڕی بەڵام چە لەسەر ئاستی ناوخۆیی و چە لەسەر ئاستی دەرەكیشدا چەند هێز و لایەنێك هەبوون كە دەژایەتی ئەو پڕۆسەیەیان دەكرد. چەند كەس و لایەنێك هەبوون كە نەیاندەویست توركیا لە كێشە و گرفت رزگاری بێ و ئەو جۆرە هێز و لایەنانە هێشتا بەردەوامن لەسەر ئەو هەڵوێستانە بۆیە ئێمە وەكو دەسەڵاتی سیاسی توركیا ئامادەی رووبەڕووبوونەوە لەگەڵ هەر جۆرە ئاژاوەگێڕییەكدان. لە رۆژانی شەش و حەفتی تشرینی یەكەم ئەو ئاژاوەگێڕییە كرا هەوڵ درا توركیایش ببێتە وڵاتێكی دابەشكراو وەكو سوریا. دەیانەویست كە رەوشی توركیا لە رەوشی سوریا، میسر و ئۆكراینا خرابتر بكەن، بەڵام خەڵكی توركیا رووبەڕوویان بوویەوە. ئەگەر لە 30ی ئاداردا خەڵكی توركیا ئیرادەی پێویست و هەڵوێستی پێویستی نیشان نەدابایە ئەوا ئەمڕۆ ئەو دەرفەتەمان نەدەبوو كە لەم هۆڵەدا كۆ ببینەوە".
قورتوڵموش بەو جۆرە درێژەی بە قسەكانیدا: "چەند كەس و لایەنێك دەیانەوێ لە سایەی چەكەكاندا سیاسەت بكەن بەڵام بەشی هەرە زۆری خەڵكی توركیا داوای ئاشتی و ئارامی دەكەن بۆیە پشت بەخوا لێدان و كوشتن لە توركیا قەدەغە كراوە و لەمەو بەدواوە هیچ هێزێك هیچ كەس تێری ئەو كارانە ناكا. توركیا لە رووبارێكدا دەپەڕێتەوە و بۆیە لە بواری چارەسەر كردنی پرسی كورددا سەدا 70 تا سەدا 80ی رێگاكەی بڕیوە. زەرەری پەشیمانبوونەوە لەو قۆناغە زۆر زیاترە لە بەرەو پێشەوە بردنی. جارێكی دیكە رێگە بە سیاسەتی لە سایەی چەكدا نادەین و رێگا نادەین توركیایش بكرێتە وەكو سوریا".
جێگری سەرۆكوەزیرانی توركیا لە بارەی ئاكامەكانی شەڕی 30 ساڵەی ناوخۆیی توركیا قسەی كرد و گوتی: "لە شەڕی 30 ساڵەدا بە گشتی 35 هەزار كەس گیانیان لەدەست داوە، لە رێگای مامۆستاكانی زانكۆوە لێكۆڵینەوەیەكمان ئەنجامدا و لە ئەنجامی ئەو لێكۆڵینەوەیەدا دەركەوت كە شەڕی 30 ساڵە بەلانی كەمەوە 1 ترلیۆن و 200 ملیار دۆلار تێچووی بۆ توركیا هەبووە بۆیە ئەگەر توركیا ئەو پارەیەی سەرفی شەڕ نەكردبایا ئەوا داهاتی خالسی سەرانەی هەر تاكێكی توركیا ئەمڕۆ بەلانی كەمەوە دەگەیشتە 20 هەزار دۆلار یا سێیەمین پردی مەڕمەڕە پێش 10 ساڵ دروست دەكرا".
جێگری سەرۆكوەزیرانی توركیا نومان كورتوڵموش مزگێنی ئەوەیدا كە لەگەڵ چارەسەر كردنی پرسی كورددا توركیا بەرەو داهاتوویەكی گەشتر دەڕوا و هەر كەس دەبێتە خاوەنی هەموو مافەكانی خۆی بە تایبەتی ئەوانەی كە سوكایەتییان پێكراوە و مافەكانیان پێشێل كراوە، ئەوانەی گوندەكانیان وێران كراوە و ئەو شوێنانەی كە ناوەكانیان گۆڕاوە دەبنەوە خاوەن ناوی راستەقینەی خۆیان".
