داود ئۆغڵو: "هێزه‌ چه‌كداره‌كانمان له‌ سووریا و عێراق هێز و توانای ده‌وڵه‌ته‌كه‌مانی ده‌رخستووه‌"

له‌چوارچێوه‌ی سه‌ردانه‌كانی ماڵئاواییدا سه‌رۆكوه‌زیرانی توركیا ئه‌حمه‌د داود ئۆغڵو سه‌ردانی سه‌رۆك ئه‌ركانی سوپای توركیا هولوسی ئاكاری كرد.

دوای سه‌ردانه‌كه‌ی داود ئۆغڵو كه‌ ماوه‌ی دوو سه‌عات و نیوی خایاند، له‌ڕوونكردنه‌وه‌یه‌كدا جه‌ختی له‌سه‌ر دڵسۆزیی داموده‌زگاكانی حكوومه‌ت كرده‌وه‌ و ئاماژه‌ی به‌وه‌دا، له‌بابه‌تی مانه‌وه‌ی كۆماری توركیادا، هێزه‌ چه‌كداره‌كان یه‌كێكه‌ له‌و ده‌زگایانه‌ی وه‌ك بڕبڕه‌كانی پشتی وڵاته‌كه‌ی وایه‌.

داود ئۆغڵو گوتی: "هێزه‌ چه‌كداره‌كانمان هه‌میشه‌ هێز و توانای وڵاته‌كه‌مانیان ده‌رخستووه‌، هه‌م له‌به‌ره‌نگاربوونه‌وه‌ی تیرۆردا، هه‌م لە له‌ئه‌ستۆگرتنی ئه‌و ئه‌ركانه‌ی له‌ عێراق و سوریا به‌هۆی سه‌رهه‌ڵدانی ناسه‌قامگیرییه‌وه‌ له‌ناوچه‌كه‌ماندا نیشانیانداوه‌."