ئه‌ردۆغان: "زۆر نزیكبووینه‌ته‌وه‌ له‌ ئامانجه‌كانمان"

ئیستانبوڵ – AA

سه‌ركۆماری توركیا، ره‌جه‌ب ته‌یب ئه‌ردۆغان رایگه‌یاند: "هێنده‌ نزیكین له‌ ئامانجمان بۆ توركیایه‌كی مه‌زن و به‌هێز، هه‌رگیز نموونه‌ی نه‌بووه‌".

له‌ میانی به‌شداریكردنی له‌ رێوڕه‌سمی دابه‌شكردنی خه‌ڵاته‌كانی كۆبوونه‌وه‌ی هه‌نارده‌كاران كه‌ له‌ هۆڵی كۆڕ و كۆبوونه‌وه‌كانی ئیستانبوڵ ئه‌نجام درا، سه‌ركۆمار ئه‌ردۆغان گوتارێكی پێشكه‌ش كرد.

ئه‌ردۆغان به‌ تیشك خسته‌ سه‌ر ئه‌وه‌ی كه‌ هێنده‌ نزیكبوونه‌ته‌وه‌ له‌وه‌ی توركیا مه‌زن و به‌هێز بكه‌ن كه‌ هه‌رگیز نموونه‌ی نه‌بووه‌، رایگه‌یاند: "به‌ وردكردن و فڕێدانی سیناریۆكان له‌ سه‌ر وڵاته‌كه‌مان و ورد و خاشكردنی پیلانگێڕییه‌كان به‌رده‌وام ده‌بین له‌ تێكۆشان".

له‌باره‌ی گه‌شه‌ی ئابووری توركیایشه‌وه‌، سه‌ركۆماری ئه‌و وڵاته‌ گوتی: "ئیندێكسی متمانه‌ی ئابووری له‌ تشرینی دووه‌مدا به‌ رێژه‌ی له‌ سه‌دا ١،٧ زیادی كرد و گه‌یشته‌ ٩١،٣. له‌م بواره‌دا له‌ ماوه‌ی دوو مانگی دواییدا له‌ سه‌دا ٦،٢ی بڕیووه‌. به گه‌شه‌ی ئه‌رێنی له‌ سه‌دا ٠،٩ له‌ چاره‌كی سێیه‌مدا، وڵاته‌كه‌مان هاته‌وه‌ ناو قۆناغی گه‌شه‌. ژماره‌ی ئه‌و كۆمپانیایانه‌ی له‌ تشرینی دووه‌م دامه‌زراون به‌ به‌راورد له‌گه‌ڵ ساڵی رابردوو له‌ سه‌دا ١٠،٢ زیادیان كردووه‌. ته‌واوی ئه‌و پێشهاتانه‌ ده‌ری ده‌خه‌ن کە كاره‌كان باش ده‌ڕۆن به‌ڕێوه‌ و، له‌ رووی ئابوورییه‌وه‌ به‌ خێرایی دێینه‌وه‌ سه‌ر خۆمان".

ئه‌ردۆغان له‌باره‌ی نۆكه‌ندی ئیستانبوڵیشه‌وه‌ گوتی: "خوا یار بێت، له‌ چه‌ند هه‌فته‌ی داهاتوودا ته‌نده‌ر راده‌گه‌یه‌نین و ده‌ست ده‌كه‌ین به‌ نۆكه‌ندی ئیستانبوڵ. كاركردن له‌سه‌ر ئه‌مه‌ بۆ كاركردنی یه‌ك هه‌فته‌یی و یه‌ك ساڵیی ناگه‌ڕێته‌وه‌ به‌ڵكو هه‌نگاوێكه‌ كه‌ له‌ كۆتاییه‌كانی ئه‌و ماوه‌یه‌ی سه‌رۆك شاره‌وانی (ئیستانبوڵ) بووم، نراوه‌".

له‌ به‌شێكی دیكه‌ی قسه‌كانیدا ره‌جه‌ب ته‌یب ئه‌ردۆغان تیشكی خسته‌ سه‌ر پوچه‌ڵكردنه‌وه‌ی پلانی دروستكردنی رێڕه‌وی تیرۆر و گوتی: "ئه‌و رێڕه‌وه‌ تیرۆرییه‌ی ده‌ویسترا به‌ درێژایی سنووره‌كانمان له‌ باشووره‌وه‌ دروست بكرێت، پارچه‌ پارچه‌مان كرد و فڕێمان دا".