جێگری سکرتێری گشتی یەکێتیی نیشتمانی کوردستان گەیشتەوە سلێمانی

سلێمانی ـ AA

ئێوارەی ئەمڕۆ لە رێگەی فڕۆکەیەکی تایبەتەوە جێگری سکرتێری گشتی یەکێتیی نیشتمانی کوردستان، کۆسرەت رەسوڵ عەلی لە ئەوروپاوە گەیشتەوە فڕۆکەخانەی سلێمانی.

دەرباز کۆسرەت کوڕی ناوبراو لەو بارەیەوە بە ئاژانسی ئانادۆڵوی راگەیاند، دوای مانەوەی بۆ زیاتر لە دوو مانگ لە ئەڵمانیا و ئەنجامدانی چەندین پشکنین و نەشتەرگەرییەکی سەرکەوتوو بۆ نەخۆشییەکەی ، لەئێستادا باری تەندروستی باوکی زۆرباشە و گەڕایەوە ھەرێمی کوردستان.

لە رێوڕەسمی پێشوازی کردن لە جێگری سکرتێری گشتی یەکێتی، لە نێو فڕۆکەخانەی سلێمانی ژمارەیەک لە بەرپرسانی باڵای حزبەکەی و پارێزگاری شارەکە و بەرپرسانی تری حزبە کوردستانییەکان ئامادە بون.

کۆسرەت رەسوڵ عەلی لە رۆژی ١١ی تشرینی دووەمی ٢٠١٧ ، بەھۆی تێکچونی باری تەندروستییەوە گەیەندرایە نەخۆشخانەی تایبەتی فاروق لە سلێمانی ، دوای چەند رۆژێک مانەوەیی و ئەنجامدانی نەشتەرگەرییەک بۆی، رەوانەی ئەڵمانیا کرا بۆ وەرگرتنی چارەسەر و ئەنجامدانی نەشتەرگەری بۆ چارەسەری نەخۆشییەکەی

نەخۆشییەکەی کۆسرەت رەسول لە ریخۆڵەیدایە و بەھۆی وەستانی گەیشتنی خوێنەوە بووە بۆ رێخۆڵەی، بەو ھۆیەشەوە تائێستا دوو نەشتەرگەری بۆ ئەنجامدراوە.