هاوكاری دارایی ئەمریكا بۆ عێراق

وەزیری دارایی عێراق هوشیار زێباری لەگەڵ باڵیۆزی ئەمریكا لە بەغدا ستیوارت جۆنس رێككەوتنێكی هاوبەشیان واژۆ كرد.

وەزارەتی دارایی عێراق بەیاننامەیەكی لەسەر ناوەڕۆكی رێككەوتنەكە بڵاو كردووەتەوە و تێدا هاتووە، بەپێی رێككەوتنەكە، ویلایەتە یەكگرتووەكانی ئەمریكا وەك هاوكاری دارایی بۆ كڕینی چەكی پێشكەوتوو و تەكنەلۆژیای سەردەمی سەربازی بۆ پتەوكردن و بەهێزبوونی هێزەكانی ئاسمانی و وشكایی عێراق بۆ شەڕی رووبەڕووبوونەوەی تیرۆر، بڕی دوو ملیار و 700 ملیۆن دۆلار دەداتە عێراق.

لە بەیاننامەكەدا هاتووە، ئەم هاوكارییە لە چوارچێوەی ئەو هەوڵانەی حكوومەتی عێراق دێت كە بەدەستهێنانی پشتیوانی و هاوكاری دارایی لە وڵاتانی نێودەوڵەتی و دراوسێ بۆ رووبەڕووبوونەوەی قەیرانی دارایی و شەڕی تیرۆریستانی داعش وەگەڕی خستووە.

بەپێی بەیاننامەكە، لەو بڕە پارەیە، حكوومەتی عێراق 200 ملیۆن دۆلاری ئەمریكی بۆ هێزەكانی پێشمەرگە خەرج دەكات تا پێشمەرگە بتوانێت ئەركەكانی جێبەجێ‌ بكات.