ھەولێر ــ AA

ئەندامی لیژنەی دارایی لە ئەنجوومەنی نوێنەرانی عێراق، ئەحمەد حاجی رەشید رایگەیاند کە لە میانی دوو رۆژی داھاتوودا، پشکی ھەرێمی کوردستان لە پڕۆژەیاسای بوودجەی ٢٠١٢، یەکلایی دەکرێتەوە.

ئەحمەد حاجی رەشید لە لێدوانێکی رۆژنامەوانییدا ئاماژەی بەوەداوە کە تەنھا پشکی ھەرێمی کوردستان ماوە لە پڕۆژەیاسای بوودجەی ٢٠٢١دا، یەکلایی بکرێتەوە و گوتی:

"سەرجەم فراکسیۆنە کوردییەکان لە ئەنجوومەنی نوێنەرانی عێراق بۆ جێگیرکردنی پشکی ھەرێمی کوردستان لە پڕۆژەیاسای بوودجەی ٢٠٢١، لەگەڵ ئەو رەشنووسەدان کە پێشتر ھەولێر و بەغدا لەسەری رێککەوتوون".

گوتیشی: "لە میانی دوو رۆژی داھاتوودا، پشکی ھەرێمی کوردستان لە پڕۆژەیاسای بوودجەی ٢٠١٢، یەکلایی دەکرێتەوە".

ئەندامی لیژنەی دارایی لە ئەنجوومەنی نوێنەرانی عێراق، ئەحمەد حاجی رەشید ئاشکراشیکرد کە رۆژی پێنجشەممە یان سەرەتای ھەفتەی داھاتوو، پڕۆژەیاسای بوودجەی گشتیی ٢٠٢١ لە ئەنجوومەنی نوێنەران، دەخرێتە دەنگدانەوە.