سلێمانی.. بەڕێکەوتنی حاجیان بۆ بەجێگەیاندنی فەڕیزەی حەج
یەکەم کاروانی حاجیانی سنوری پارێزگای سلێمانی بەرەو عەرەبستانی سعوودیە بەڕێکەوتن بۆ بە جێگەیاندنی فەڕیزەی حەجی ئەمساڵ، بڕیارە لە ماوەی دوو ھەفتەدا تەواوی حاجیان بگەنە ئەو وڵاتە.
As Sulaymaniyah
سلێمانی ـ AA
ئەمشەو لە رێگەی فرۆکەخانەی سلێمانییەوە یەکەم کاروانی حاجیانی سنوری پارێزگای سلێمانی و دووەم کاروانی حاجیانی ھەرێم ( شەوی رابردوو یەکەم کاروانی حاجیانی ھەرێم لە رێگەی فرۆکەخانەی ھەولێرەوە بەڕِێکەوتن) بەرەو شاری مەدینە بەڕێکەوتن بۆ بە جێگەیاندنی فەڕِیزەی حەجی ئەمساڵ.
بەڕێوەبەری حەج و عومرەی سلێمانی کامەران عەلی لەو بارەیەوە بۆ ئاژانسی ئانادۆڵو گوتی:" ئەمساڵ لە سنوری پارێزگای سلێمانی ١٩٦٠ کەس بۆ بەجێگەیاندنی فەڕیزەی حەج بەرەو عەرەبستانی سعوودیە بەڕێدەکەون، ئەمشەویش یەکەم وەجبەی ئەو کەسانە لە رێگەی فڕۆکەخانەی سلێمانییەوە راستەوخۆ دەگەنە فڕۆکەخانەی مەدینە و ژمارەیان ١٧٩ کەسە".
لە ھەرێمی کوردستان ئەمساڵ ٤ ھەزار و ٨٦٧ کەس بۆ ئەنجامدانی فەڕیزەی حەج ناویان دەرچووە و لە رێگەی ھەردوو فڕۆکەخانەی ھەولێر و سلێمانیەوە گەشتەکان ئەنجام دەدەن.
بەڕێوەبەری حەج و عومرەی سلێمانی ئاماژەی بەوەش کرد، بۆ ئەمساڵ پشکی ھەرێم لەسەدا ٢٠ زیادی کردووتەوە، دوای ئەوەی لەماوەی چەند ساڵی رابردوودا بەھۆی فراوانکردنی حەرەمی مەکەوە ئەو رێژەیە لە حاجیانی عێراق و ھەرێمی کوردستان بڕابوو.
پێش بەڕێکەوتنی حاجیان، بۆ رێگری لە بڵاوبونەوە و تووشبون بەھەر جۆرە نەخۆشی و ڤایرۆسێک لەو وڵاتە کوتانیان بۆ ئەنجامدرا.
