Werzişvanên bêrê yên siberojê di Gola Wanê da tên perwerdekirin

Li Xelata navçeya Bidlîsê werzişvanên tîma bêrê ji bo ku bibin werzişvanên şampiyon ên siberojê perwerdeyê distînin.

Werzişvanê neteweyî yê berê û antrenorê bêrê Ali Herseklioglu ku par wekî mamosteyê saxlemiya bedenê tayîna wî derket navçeyê, tîmek damezirand da ku di vê qadê da ciwanên 13-15 salî perwerde bike.

Herseklioglu bi piştevaniya Qaymeqamtî û Midûriyeta Ciwanî û Werzişê ya Navçeyê tîma bêrê damezirand û her wiha di Gola Wanê da hefteyê 6 rojan perwerdeyê dide beşdarên tîmê.

Herseklioglu bal kişand ku Gola Wanê yek ji wan ciyan e ku ji bo werzişa bêrê guncan e û wiha dewam kir, "Ez dixwazim werzişvanên şampiyon ên siberojê perwerde bikim û her wiha van werzişvanan bişînim Tîma Neteweyî jî."

Herseklioglu her wisa bal kişand ku Qaymeqamtî û Midûriyeta Ciwanî û Werzişê ya Navçeyê zehf alîkariya wî dikin û dewam kir, "Qedera salekê ye xebatên me didomin. Xebatên me yên ji bo pêşbaziyên di kategoriya 13, 14 û 15 saliyê didomin. Armanca me ew e ku em ewil beşdarî pêşbirkan bibin û pile û her wiha madalyayan bi dest bixin. Dû ra jî em dixwazin ji Xelatê werzişvanên neteweyî derxin. Di hefteyê da 6 rojan antrenmanên me hene."

Werzişvan Muhammed Yigit jî diyar kir ku ew zehf ji werzişa bêrê hez dike û dixwaze di şampiyonaya Tirkiyeyê da bibe şampiyon.