Di bin sewta kilamên dengbêjan da qebale dixebitin

AGRI

Cotkarên li Herêma Rojhilatê Anadoluyê mêrg û giyayên xwe yên li ciyên asê bi tirpanê û bi qaydê bav û kalan qebale diçinin.

Herêma Rojhilatê Anadoluyê yek ji wan herêman e lê cotkarî û heywadarî zêde tê kirin. Cotkarên li herêmê li ciyên asê mêrg û giyayên xwe bi tirpanê diçinin.

Cotkar qebale mêrg û giyayên xwe diçinin û ji bo zivistanê haziriya xwe dikin.

Li Zozanê Sînegê ya li Taşliçaya navçeya Agiriyê tirpankêş qebale dixebitin û zozan bi saya wan şên dibe.

- Him kilama dibêjin û him jî tirpanê dikşînin

Tirpankêş ber destê sibehê li ciyên asê di bin sewta kilamên dengbêjan da mêrg û giyayên xwe diçinin.

Cotkar him kevneşopiya tirpankêşiyê berdewam dikin û him jî ji bo heywanên xwe amadehiya zivistanê dikin.

Kemal Artanê ji Tanyoluya gundê Taşliçayê daxuyanî da nûçegihanê AAyê û destnîşan kir îro tirpankêşî li Agirî, Qers, Îdir û Erdexanê hê jî dewam dike.

Artan diyar kir bi gelemperî li ciyên asê bi tirpanê mêrg û giyayên xwe diçinin û wiha got: "Em her sal bi qebale alîkariya hev dikin û mêrg û giyayê xwe diçinin. Ji ber ku halet û hacetên çandiniyê yên nû dernakevin ciyên bilind em jî bi qebale/zibare dixebitin û îş û karê xwe dikin. Dema tirpankêş dixebitin dengbêj kilama dibêjin û wext xweş derbas dibe."

Ji cotkaran Mîrza Artan destnîşan kir debara xwe bi xwedîkirina heywanan dikin û wiha xeberda: "Em qebale dixebitin. 5-10 kes kom dibin û diçin alîkariya hev dikin."

- "Ez bi saya tirpanê li ser xwe me"

Cemalettîn Artanê tirpankêş jî destnîşan kir ji bav û kalê xwe vî karî hîn bûne û wiha got: "Ji biçûkan heta mezinan li gund her kes dikare tipan bikişîne. Tirpan ji bo qeweta pişt û milan baş e. Bi saya tirpankêşiyê li ser xwe me. Ez 52 salî me û bi saya tirpanê li ser xwe me."