Hikûmeta li Xezeyê daxuyand di êrîşên Îsraîlê yên dijî Xeta Xezeyê yên ji 7ê Cotmehê vir va dewam dikin da 6 hezar û 500 kes winda ne.

Midûrê Giştî yê Ofîsa Medyayê ya Xezeyê Îsmaîl es-Sewabîte li ber Nexweşxaneya Şehîdên Eqsayê civîneke çapemeniyê li dar xist û der barê kesên di êrîşên Îsraîlê da winda bûne da agahî da.

Sewabîte daxuyand Îsraîl êrîşên xwe didomîne û îro jî di van êrîşan da bi dehan kes mirine û birîndar bûne.

Sewabîte anî ziman di êrîşên Îsraîlê yên dijî Xeta Xezeyê yên ji 7ê Cotmehê vir va tên kirin da 6 hezar û 500 kes an di binê kavilan da mane an jî aqûbeta wan nayê zanîn.

Sewabîte ji ber êrîşên dijî Xezeyê Îsraîl û rêvebiriya Amerîkayê sûcdar kir.

- Lihevkirina berdêlîkirina dîlan ya di navbera Îsraîl û Hemasê da

"Navbera însanî" ya ji bo ku pevçûn 4 roj rawestin di navbera Îsraîl û Hemasê da çêbûbû di 24ê Mijdarê roja înê saet 08.00an da dest pê kiribû û paşê 3 rojan hatibû dirêjkirin.

Li gor vê lihevkirinê ji Xeta Xezeyê 81 Îsraîlî û ji girtîgehên Îsraîlê jî 240 Filistînî hatibûn berdan.

Piştî "navbera însanî" qediya artêşa Îsraîlê dîsa dijî Xeta Xezeyê dest bi êrîşan kir.