Herêma Kurdistanê destpêşxeriya Îbadî erênî dibîne

HEWLÊR

Hikûmeta Herêma Kurdistana Iraqê ragihand ku ew destpêşxeriya Serokwezîrê Iraqê Heyder El Îbadî ji bo guftûgoyê bi erênî pêşwazî dikin.

Lijneya Wezîran a Herêma Kurdistanê îro li Hewlêrê bi Serokatiya Serokwezîr Nêçîrvan Barzanî û amadebûna Cîgirê Serokwezîr Qudab Talebanî birêve çû.

Di civînê de bûyerên li Kerkûkê û piştre jî deverên di çarçoveya madeya 140î de hat nirxandin û rewşa niha ya Kerkûkê û navçeyên din hat axaftin.

Hikûmeta Herêma Kurdistanê destpêşxeriya (înisiyatîf) Serokwezîrê Iraqê Heyder El Îbadî ji bo destpêkirina guftûgoyê û çareserkirina problemên di navbera Bexda û Hewlêrê de li gor esasên destûrê û di çarçoveya şirîkatî û tewafiqê de li Iraqê bi erênî pêşwazî kir. Hikûmet amadebûna xwe ji bo guftûgoyan derbirî.

Hikûmetê ji bo vê yekê bangewaziya civaka navnetweyî kir ku di destpêkirin û birêveçûna guftûgoyên di navbera Hewlêr û Bexdayê de hevkariya herdu aliyan bikin.

Herwiha daxwaz ji xelkê Kurdistanê hat kirin ku bi hana xelkê Tûzxurmatû û Kerkûkê ve biçin.