Kuvendi i Kosovës debaton për arrestimin e aktivistëve të VV-së

PRISHTINË (AA) - Në seancën e sotme të Kuvendit të Kosovës pos tjerash u mbajt edhe debati parlamentar, sipas kërkesës së deputetit të Lëvizjes Vetëvendosje, Glauk Konjufca, i mbështetur edhe nga nëntë deputetë tjerë lidhur me arrestimet e aktivistëve të Lëvizjes Vetëvendosje për sulmin ndaj Kuvendit të Kosovës, raporton Anadolu Agency (AA).

Gjatë fjalimit të tij, inicuesi i debatit, Glauk Konjufca tha se këto arrestime janë një projekt i pushtetit për ta përjashtuar dhe diskualifikuar VV-në nga politika, e cila sipas tij, mund të bëhet nëpërmjet shpalljes së kësaj partie si "organizatë terroriste".

“Kjo përpjekje e Qeverisë është kristalizuar më qartë dhe ka marrë formë konkrete më 28 nëntor të vitit 2015 kur dikush nga qeveria, nuk e di sakt kush, ka marrë vendim që zyret e subjektit më të madh opozitar në vend të thyhen përmes aktivizimit të njësitit anti-terrorist, i përbërë prej 36 vetësh, i cili ka hyrë në VV me një brutalitet me një dhunë e cila moti nuk është parë në Kosovë, duke shkaktuar lëndime, përplasje dhe rrahje të jashtëzakonshme”, tha Konjufca.

Ai theksoi se kjo ka ndodhur për shkak të rezitencës së VV-së kundër marrëveshjeve si të demarkacionit dhe të asociacionit të krijimit të komunave me shumicë serbe.

Konjufca po ashtu tha se Qeveria po ia mveshë VV-së sulmin ndaj Kuvendit, nëpërmjet projekteve për të cilat, sipas tij, policia fabrikon prova dhe prokuroria detyrohet të zbatojë urdhëra politike. Konjufca së fundmi theksoi se prokuroria ka dështuar që të argumentojë se aktivistët e VV-së janë njerëzit të cilët qëndrojnë prapa sulmit të Kuvendit dhe sipas tij, edhe forenzika tregon që nuk ka asnjë lidhje rreth këtyre të arrestuarve me sulmin.

Ndërkaq partitë e koalicionit qeverisës, Lidhja Demokratike e Kosovës (LDK) dhe Partia Demokratike e Kosovës (PDK) thanë se debatet e tilla janë ndërhyrje në punën e institucioneve të drejtësisë dhe të policisë së Kosovës. Shefi i grupit parlamentar të PDK-së, Zenun Pajaziti tha se të gjithë duhet të punojnë për institucione sa më të mira të drejtësisë dhe për t’u lënë punën atyre. Ai theksoi se VV tani po bën një përshkrim të njëanshëm të ngjarjeve dhe kërkoi që të mos bëhen paragjykime për arrestimet.

“Duhet bashkërisht të bëjmë thirrje unike që institucionet e drejtësisë ta kryejnë punën e tyre në mënyrë të pavarur që institucionet e drejtësisë t’i marrin të gjitha veprimet e mundshme që këto raste të sqarohen sa më shpejt. Ne duhet ta dijmë sa më shpejtë që kush ishin aktorët e sulmit të turpshëm mbi Kuvendin e Kosovës. Por, po ashtu nëse dikush ka të dhëna që veprimet e organeve të drejtësisë janë të motivuara ose të dirixhuara nga politika duhet t’i bëni këto fakte publike”.

Kurse shefi i grupit parlamentar të LDK-së, Ismet Beqiri tha se ky debat është vazhdim i ndërhyrjes në punën e policisë, prokurorisë dhe të drejtësisë së Kosovës. Ai rikujtoi se nga shtatori i vitit 2015 deri në mars të vitit 2016 ka qenë periudhë e rëndë si për qytetarët ashtu edhe për Kuvendin të cilët kanë qenë të rrezikuar nga veprimet e VV-së.

“Dhunës, fishkëllimave, pse jo kacafytjeve, gazit lotsjellës, të gjithë këto në emër të së drejtës të atyre që vepronin të veprimit politik siç thuhet, nën mbrojtje të kauzave që i thonin dhe i mbronin. Sikur kjo nuk mjaftoi dhe sigurisht të gjithë jemi dëshmitarë në një mënyrë të inspiruar të sjelljeve të tilla në Kuvend dhe në organizimin e partive opozitare një kohë bashkë e më vonë vetëm nga VV, u organizuan protesta që është një e drejtë normale dhe e garantuar me të drejtë ligjore, por deri këtu sepse protestat pastaj ishin shumë të dhunshme, u sulmuan institucionet e vendit”, tha Beqiri.

Në anën tjetë, ministri i Punëve të Brendshme, Skender Hyseni tha se as ky debat e as një mijë debate tjera nuk mund ta detyrojnë atë që të japë urdhëra politike. Ai vuri në dukje se për shkak të mos përzierjes së tij në policinë e hetuesisë, nuk ka bërë as një lëvizje të vetme për arrestimet.

“E kam pritur këtë debat që të them me zë të lartë që do të tmerrohesha skajshëm po të më shkonte mendja se në çfarë do mënyre si ministër i Brendshëm jo si qytetar i këtij vendi, jam pjesë e skenimeve ose konstruksioneve që mua personalisht më tingëllojnë si fantastikë shkencorë”, tha Hyseni.

Ndërkaq gjatë debatit, përderisa mbante fjalim deputetja e VV-së, Albulena Haxhiu dy deputetë të VV-së hapën një pano me fotografi të zyrtarëve të lartë të institucioneve të Kosovës, të cilët sipas Haxhiut, janë pjesë e orkestrimit i të gjithë këtij procesi. Në pankartë ishin fotografitë e ministrit të Brendshëm, Skender Hyseni, drejtorit të Policisë së Kosovës Shpend Maxhuni, drejtorit të Radio-Televizionit të Kosovës, Mentor Shala, ministres së Drejtësisë Dhurata Hoxha, ish kryeprokurorit të Prizrenit, Sylë Hoxha dhe disa zyrtarëve të tjerë.

Ndërkaq, në fund të seancës, inicuesi i debatit Glauk Konjufca kërkoi që votimi i konkluzioneve të votohet në seancën e ardhshme të Kuvendit të Kosovës.

Gjashtë aktivistë të Lëvizjes Vetëvendosj, ku në mesin e tyre ishte edhe i ndjeri Astrit Dehari, i cili vdiq përderisa ndodhej në paraburgim, ishin arrestuar më 30 gusht për sulmin ndaj Kuvendit më datën 4 gusht të vitit të kaluar.