Шефот на турската дипломатија ќе го претставува претседателот Ердоган на самитот на ПСЈИЕ

Турскиот министер за надворешни работи, Хакан Фидан, утре во главниот град на Бугарија, Софија, ќе го претставува претседателот Реџеп Таип Ердоган на Самитот на шефови на држави и влади на Процесот за соработка во Југоисточна Европа (ПСЈИЕ) во Софија, соопштија дипломатски извори од турското Министерство за надворешни работи, јавува Анадолу.

Самитот, чиј домаќин е Бугарија во рамките на своето ротирачко претседателство, ќе се одржи под темата „Зајакнување на регионалното единство за стабилна, безбедна и одржлива иднина: Осврт на 30-годишното партнерство и напредок“.

Се очекува на самитот да присуствуваат шефови на држави и Влади, министри за надворешни работи од 13-те земји учеснички во ПСЈИЕ, како и генералниот секретар на Советот за регионална соработка, кој е оперативен орган на организацијата.

Исто така, се очекува учесниците да усвојат и декларација од самитот.

Се очекува Фидан во своето обраќање да ја повтори поддршката на Турција за засилена соработка на Балканот, заснована на принципите на регионална сопственост и инклузивност, истовремено нагласувајќи го значењето што Анкара му го придава на ПСЈИЕ како една од главните платформи за дијалог во регионот и како земја основач на иницијативата.

Се очекува Фидан да ја нагласи и стратегиската важност на Балканот за регионалната и пошироката меѓународна безбедност, истакнувајќи ја потребата од зајакнување на добрососедските односи и регионалната соработка.

Турскиот министер за надворешни работи се очекува да ја нагласи поддршката на Турција за проектите за поврзување, вклучувајќи ги транспортните и енергетските мрежи, со цел да се зајакне регионалната интеграција и да се поттикнат економскиот раст и просперитетот.

Се очекува Фидан да ја потврди поддршката на Турција за дипломатските напори насочени кон постигнување праведен и траен мир во руско-украинската војна, како и да повика на продолжување на дијалогот меѓу Иран и САД за да се спречат нови регионални тензии.

Исто така, се очекува Фидан да го привлече вниманието на фактот дека израелските политики на окупација и анексија во Газа, на Западниот Брег и во Либан имаат за цел да создадат трајна средина на нестабилност и конфликти на Блискиот Исток, како и да нагласи дека овие незаконски дејствија на Израел уште еднаш ја потсетуваат меѓународната заедница на нејзините заеднички одговорности засновани на мир и правда, и дека меѓународното право и хуманитарните вредности мора да бидат заштитени без исклучок.

Основан во 1996 година, ПСЈИЕ е единствената регионална платформа за соработка која ги вклучува сите балкански земји. Нејзини членки се Албанија, Босна и Херцеговина, Бугарија, Хрватска, Грција, Косово, Молдавија, Црна Гора, Северна Македонија, Романија, Србија, Словенија и Турција.

Струкуриран е како флексибилен постојан механизам за консултации кој функционира со едногодишни ротирачки претседателства, а Турција претходно претседаваше со ПСЈИЕ во периодите 1998-1999, 2009-2010 и 2020-2021 година.

Романија треба да го преземе ротирачкото претседателство со ПСЈИЕ на 1 јули оваа година.