Турскиот претседател Ердоган ја повтори поддршката за прекинот на огнот меѓу Русија и Украина

ИСТАНБУЛ (АА) - Турскиот претседател Реџеп Таип Ердоган денес ја повтори поддршката за прекинот на огнот меѓу Русија и Украина, истакнувајќи дека НАТО не треба да биде дел од војната, јавува Анадолу.

Претходно, Ердоган, заедно со турскиот министер за надворешни работи Хакан Фидан, го примија генералниот секретар на НАТО, Марк Руте, во Претседателскиот комплекс во Анкара и одржаа состанок зад затворени врати.

Разговорите се фокусираа на развојот на настаните во војната меѓу Украина и Русија и глобалните и регионални прашања.

Предлогот за безусловни преговори во Истанбул на 15 мај го даде рускиот претседател Владимир Путин за време на прес-конференцијата во Москва во неделата.

Подоцна истиот ден, Ердоган ја потврди подготвеноста на Турција да биде домаќин на состанокот.

За време на состанокот, Ердоган изјави дека Турција му придава важност на НАТО и во однос на тоа, Турција повторно ќе ја преземе командата на силите на НАТО во Косово, истакна Дирекцијата за комуникации на Турција.

Турскиот претседател посочи дека Турција очекува соработка од своите сојузници во борбата против тероризмот и дека Турција ќе продолжи да прави сѐ што е во нејзина моќ за да го одржи НАТО силен и покрај внатрешните и надворешните предизвици.

Ердоган додаде дека Турција ги зголемила своите напори за завршување на војната меѓу Украина и Русија со траен и праведен мир, и дека реализирал разговори со Путин и украинскиот претседател Владимир Зеленски.

„Турција силно го поддржува воспоставувањето сеопфатен прекин на огнот“, рече турскиот претседател, додавајќи дека можноста за мир не треба да се пропушти.