Турскиот потпретседател Октај: „Бројот на корисници на платформата „Дигитална Турција“ надмина 51,2 милиони“

АНКАРА (АА) - Потпретседателот на Република Турција, Фуат Октај, изјави дека бројот на корисници на услугите на платформата „Дигитална Турција“ надмина 51,5 милиони и дека таа стана мрежа преку која 691 институција и организација обезбедуваат 5.287 услуги, јавува Агенција Анадолија (AA).

Во обраќањето на парламентарната Комисија за изработка на буџетот за следната година, турскиот потпретседател Октај го презентираше планот за работа на институциите кои дејствуваат под ингеренции на Кабинетот на турскиот претседател, а посебно укажа на значењето на платформата „Дигитална Турција“, која претставува стратешки проект за обединување на секторите за технологија, комуникации и електроника, со цел поддршка на економскиот раст на земјата.

Под закрила на турскиот претседател дејствуваат Турската разузнавачка служба (МИТ), Генералниот секретаријат на Советот за национална безбедност, Дирекцијата за верски работи, Дирекцијата на државниот архив, Дирекцијата за управување со националните палати, Дирекцијата за стратегии и буџет, Дирекцијата за комуникации и Дирекцијата за одбранбена индустрија.

„Со посредство на Канцеларијата за инвестиции, до крајот на октомври започнати се 18 инвестициски проекти во вкупна вредност од 388 милиони долари“, рече Октај.

Тој, исто така, укажа на важноста на проектот Центар за односи со јавноста (CIMER), кој го води Дирекцијата за комуникации при турското Претседателство, и додаде дека тој центар до крајот на октомври примил речиси 5 милиони барања и одговорил на повеќе од 90 отсто од тие прашања.

Целта на проектот е јакнење на мостовите меѓу граѓаните и државата за што побрза и што поефикасна реакција на јавните институции на прашањата на граѓаните.

Октај рече дека Дирекцијата за одбранбена индустрија продолжува со важни проекти и истакна дека наменската индустрија на Турција претходната година остварила промет од речиси 11 милијарди долари и извоз од 3 милијарди долари.

Турската наменска индустрија во моментов води над 700 проекти, а Октај рече дека во тек е сериското производство на хеликоптерите АТАК и беспилотните летала БАЈРАКТАР ТБ2 и АНКА, кои се целосно домашни производи на турската индустрија.

„Првата домашна турска ракета воздух-воздух ЃОКТУГ е во фаза на тестирање на авиони, а нашата прва домашна поморска ракета АТМАЏА влезе во сериско производство. Продолжува и производството, испораката и извозот на нашата домашна паметна муниција и сетови за наведување“, рече Октај.

Турскиот потпретседател ја пофали и работата на Турската разузнавачка служба и рече дека МИТ спроведува ефикасни и плодни операции во и надвор од Турција.