АНКАРА (АА) - ЕСИН ИШИК-
„15 јули - Музејот на демократијата“, кој ќе биде отворен утре од страна на турскиот претседател Реџеп Таип Ердоган, со посебни звучни и визуелни ефекти ќе го прикаже предавничкиот обид за државен удар, а посетителите уште еднаш ќе можат да се потсетат на духот на единство што го спречи пучот, јавува Агенција Анадолија (АА).
Музејот, изграден спроти Претседателскиот комплекс во Бештепе, се состои од осум сали изградени под земја насловени како „Воени удари во Турција и во светот“, „Закана од еден куршум“, „Истрчување во темнината“, „Најдолгата ноќ“, „Оние што оставија траги“, „Села“, „Почит кон шехидите“ и „Дежурства на демократијата“.
Во првиот дел од музејот, чија цел е да го покаже она што се случи на 15 јули 2016 година, преку дигитални методи за идните генерации ќе се прикажат и воените удари во Турција и светот, во писмена форма и визуелно.
Покрај тоа, во еден мрачен коридор на музејот посетителите ќе поминат под тенк во придружба на звучни и светлосни ефекти.
Посетителите во салата наречена „Најдолгата ноќ“ преку видеопроекција ќе бидат сведоци на настаните од почетокот на обидот за пуч на 15 јули, сѐ до неговото задушување.
Во музејот, повредените и роднините на загинатите херои кои се спротивставија на пучот на 15 јули, со специјална продукција ќе ги споделат своите искуства за таа вечер.
Исто така, посетителите, поминувајќи низ ходникот на салонот „Села“, ќе стигнат до делот каде што ќе може да ги слушаат приказните за 251-от загинат херој.
Во музејот, биографијата на секој загинат ќе се прикажува посебно, во делови направени во форма на призма.
Во последниот дел од музејот со стаклена купола дизајнирано е дрво кое со своите корени го симболизира минатото на Турција, а со своите гранки и лисја светлата иднина.
Исто така, под најголемото вештачко дрво во Турција, со висина од 23 метри, направени се 90 силиконски скулптури што ги претставуваат луѓето кои дежураа за демократијата по 15 јули.
Во музејот, на еден потег во должина од 235 метри, наречен долина, релјефно се прикажани важните и големи делови од историјата на Турција.
Во долината која се протега до Споменикот на шехидите, има двоглав орел, симбол што се користел во градбите на Селџуците во Анадолија и симболите на 16 држави основани од страна на Турците низ историјата.
