Рама на „ТРТ Ворлд форум“: Војната во Украина е пресвртница за европската и западната безбедност

АНКАРА (АА) - Војната во Украина е пресвртница за европската безбедност и безбедноста на Западот, изјави албанскиот премиер Еди Рама на свеченото отворање на „ТРТ Ворлд форум“ во Истанбул, јавува Агенција Анадолија (АА).

„Инвазијата на Крим мора да беше црвена линија за која не може да се преговара и за ЕУ ​​и за НАТО, за сите нас на Запад, но наместо тоа, ние продолживме да живееме во илузијата дека таков голем прекршок само ќе доведе до континуирани замрзнати конфликти без реални и непосредни последици за безбедноста на Западот“, рече Рама.

Според неговите зборови, тие илузии биле уништени кога Русија започнала војна против Украина на 24 февруари.

Осврнувајќи се на улогата на Туркије на глобалната сцена, албанскиот премиер рече дека Туркије „придонесува за европската и глобалната безбедност со својот флексибилен и прагматичен пристап и со своите напори да развие силни и добри партнерства“.

„Туркије навистина служеше и може да послужи, како што сме сведоци денес, како посредник на многу спорови поврзани со традиционалната безбедност, како и на новите безбедносни предизвици во областа на енергијата, снабдувањето со храна и миграцијата“, рече Рама.

Зборувајќи за мигрантската криза предизвикана од сириската граѓанска војна, Рама рече дека Туркије сама успеала да ја контролира кризата.

„Без Ангела Меркел [поранешната германска канцеларка] немаше да се спаси честа на Европа. Таа беше таа која се залагаше за пречек на мигрантите во Германија во таа голема криза. Но без Реџеп Таип Ердоган, ѕидовите на Европа не би издржале“, изјави албанскиот премиер.

Тој рече дека Туркије е клучот за стабилноста на Европа.