Разговор Ердоган-Ал Судани: Сирискиот режим мора да се вклучи во вистински политички процес

АНКАРА (АА) - Турскиот претседател Реџеп Таип Ердоган и ирачкиот премиер Мухамед Шија ал Судани разговараа телефонски, јавува Анадолу.

Како што соопшти Дирекцијата за комуникации на Кабинетот на турскиот претседател, Ердоган за време на разговорот рекол дека приоритет на официјална Анкара е да го зачува мирот надвор од нејзините граници и да спречи штета на цивилното население.

Ердоган исто така рече и дека единството, стабилноста и територијалниот интегритет на Сирија се важни и дека Туркије и Ирак се согласуваат за тоа.

Турскиот претседател истакна дека сирискиот режим мора да се вклучи во вистински политички процес за да спречи натамошно влошување на ситуацијата во земјата.

Ердоган посочи дека, во согласност со националната безбедност и интереси, Туркије презела и ќе продолжи да презема чекори за да ја спречи терористичката организација ПКК и нејзините ограноци кои се обидуваат да извлечат корист од ситуацијата на теренот.

Антирежимските вооружени групи зазедоа уште шест населени места и водат жестоки битки против силите лојални на режимот на Башар ал Асад, на само шест километри од центарот на градот Хама во Сирија.

Антирежимските сили, предводени од групата Хајат Тахрир ал Шам, веќе седум дена се борат против силите на режимот на Асад и продолжуваат да напредуваат кон центарот на провинцијата Хама.

Овие групи напредуваат кон Хама од три правци, а фронтот на судири моментално се наоѓа на шест километри од центарот на тој сириски град.

Судирите избија на 27 ноември меѓу силите на режимот на Асад и антирежимските вооружени групи во западниот дел на Алепо во северна Сирија, што означи повторна ескалација на конфликтот по периодот на релативна смиреност во граѓанската војна што избувна во Сирија во 2011 година.

Антирежимските групи на 30 ноември го зазедоа квартот Кан Шејхун и ја презедоа контролата врз Идлиб, а продолжуваат да напредуваат во провинцијата Хама. Опозициската Сириска национална армија го ослободи центарот на Тел Рифат од терористичката организација ПКК/ЈПГ.