Претседателот на Турција, Ердоган, оствари телефонски разговор со гувернерите на поплавените региони

АНКАРА

Претседателот на Турција, Реџеп Таип Ердоган, внимателно ги следи поплавите настанати поради обилните врнежи во Црноморскиот Регион, особено во градовите Бартин, Синоп и Кастамону, пренесува Агенција Анадолија (АА).

Според писмената изјава дадена од Одделот за комуникации при турското Претседателство, претседателот Ердоган е во постојан контакт со министерот за внатрешни работи, Сулејман Сојлу, министерот за животна средина и урбанизација, Мурат Курум и министерот за транспорт и инфраструктура, Адил Караисамиоглу, кои се наоѓаат во поплавените региони и од нив добива моментални информации за ситуацијата.

Претседателот Ердоган, исто така, оствари телефонски разговор со гувернерите на регионите погодени од поплавите. Ердоган истакна дека државата е мобилизирана со сите средства и е заедно со граѓаните кои се погодени од поплавите.

Ердоган, меѓу другото, посака Божја милост за граѓаните кои го загубија животот во поплавите.