Alperen Aktaş
27 Декември 2023•Ажурирај: 28 Декември 2023
АНКАРА (АА) – Комисијата за надворешни работи на турскиот Парламент синоќа го одобри предлог-регулативата со кој се дава зелено светло за пристапување на Шведска во НАТО, оставајќи го само уште гласање во Големото народно собрание на Република Туркије за да се дозволи или одбие целосното одобрување од Туркије, јавува Анадолу.
Пред клучното гласање, заменик-министерот за надворешни работи, Бурак Акчапар, ја информираше комисијата за процесот за членство на Шведска во НАТО, а пратениците се осврнаа на предлогот.
Турскиот претседател Реџеп Таип Ердоган во октомври го потпиша протоколот за пристапување на Шведска во НАТО и го достави до Парламентот.
Шведскиот министер за надворешни работи, Тобијас Билстром, ја поздрави веста, велејќи на Х: „Го поздравуваме одобрувањето на барањето за членство на Шведска во НАТО во Комисијата за надворешни работи на Туркије. Следен чекор ќе биде гласањето во Парламентот за ова прашање. Со нетрпение очекуваме да станеме членка на НАТО.“
Финска и Шведска - двете нордиски земји кои се блиску или граничат со Русија - аплицираа за членство во НАТО веднаш откако Русија ја започна својата војна против Украина во февруари 2022 година.
Туркије го одобри членството на Финска во Алијансата овој март, но рече дека чека Шведска да се придржува до трилатералниот меморандум од јуни 2022 година и да одговори на безбедносните грижи на Анкара.
Сите нови членки на НАТО мора да бидат одобрени од сите сегашни членки, вклучително и Туркије, членка на Алијансата повеќе од 70 години, која може да се пофали со втора по големина армија во Алијансата.
Унгарија е единствена членка на НАТО покрај Туркије која сè уште не ја одобрила кандидатурата на Шведска за придружување во Алијансата.
