Merve Berker,Esra Tekin
23 Октомври 2024•Ажурирај: 24 Октомври 2024
АНКАРА/ИСТАНБУЛ (АА) – Турскиот претседател Реџеп Таип Ердоган денес изјави дека гнасниот терористички напад врз објектот на турската Воздухопловна и вселенска индустрија (ТУСАШ) во подрачјето на главниот град Анкара всушност бил насочен кон опстанокот, мирот и одбраната на земјата, известува Анадолу.
Претседателот Ердоган рече дека тоа е подмолен напад врз идеалот за „целосно независна Туркије“, која прави извонреден напредок во одбранбената индустрија.
„Терористичкиот напад врз ТУСАШ, една од локомотивите на организациите на турската одбранбена индустрија, е подмолен напад кој е насочен кон опстанокот на нашата земја, мирот на нашата нација и нашите одбранбени иницијативи кои се симбол на нашиот идеал за „Целосно независна Туркије“, напиша Ердоган на социјалната мрежа X.
Турскиот претседател истакна дека безбедносните сили во земајта брзо интервенирале и ги неутрализирале терористите.
„Ниту една структура, ниту една терористичка организација која ги има за цел нашата безбедност нема да може да ги постигне своите цели и да успее во своите зли намери. Одлучно ќе продолжи нашата борба против сите видови терористички закани и нивните поддржувачи“, нагласи Ердоган.
Изразувајќи сочувство до жртвите од нападот и до целата нација, турскиот претседател на ранетите им посака брзо закрепнување.
Претходно Ердоган соопшти дека во нападот животот го загубиле 4 лица, а 14 се повредени.
Обвинителите во Анкара започнаа истрага за терористичкиот напад.
