Ekipa
18 Ноември 2019•Ажурирај: 19 Ноември 2019
ИСТАНБУЛ (АА) - Турскиот претседател, Реџеп Таип Ердоган, истакна дека никаква моќ ниту влијание не можат да урнат држава зад која стои народот, јавува Агенција Анадолија (AA).
Ердоган на 2. Меѓународна конференција на омбудсмани, што се одржува во палатата „Долмабахче“ во Истанбул, рече дека во денешниот свет многу поранливи на внатрешните и на надворешните интервенции се државите кои не можат да воспостават силни врски со своите граѓани.
„Државите кои не го слушаат гласот на сопствениот народ, не бараат решение за неговите проблеми, туку сосема спротивно, неговите приговори ги потиснуваат на груб начин, може да се соочат со големи страдања и уништувања“, нагласи претседателот Ердоган.
Тој, исто така, посочи дека и покрај тоа што Турција се соочува со многу закани, од нападите на терористичките организации до економски стапици, успеала да остане цврсто на нозе и постојано да ја зголемува својата моќ.
- „Турција е земја која дава најголема поддршка на бегалците во светот“ -
Претседателот Ердоган, наведувајќи дека Турција е земја која дава најголема поддршка на бегалците во светот, нагласи:
„Некои се во акција за поделба на нафтата. Тоа го кажаа и пред нас. Ние им одговоривме: ‘Нас нè не засега нафтата, нас нè засегаат луѓето‘...“
Ердоган во своето обраќање на Конференцијата рече дека Турција е земја која дава најголема поддршка на најмалку развиените земји и на бегалците во светот.
