Merve Berker
10 Ноември 2023•Ажурирај: 11 Ноември 2023
АНКАРА (АА) - Случувањата во Појасот Газа, повеќе од еден месец израелски напади, претставуваат „голема несреќа, катастрофа, злосторство против човештвото“, изјави денес турскиот претседател Реџеп Таип Ердоган, јавува Анадолу.
Турскиот народ ќе продолжи да ги поддржува жителите на Газа, тие одбиваат „да ги напуштат своите домови и територија до крајот, со сила што ја добивме и од гласот на совеста“, рече Ердоган на комеморативниот настан за основачот на Туркије, Мустафа Кемал Ататурк.
Почитувајќи го споменот на Ататурк на 85-годишнината од неговата смрт во Националниот конгресен и културен центар „Бештепе“ во главниот град Анкара, Ердоган се осврна и на теми како Европската Унија (ЕУ), Обединетите нации (ОН), конфликтот во Газа и националната безбедност.
„Ја продолжуваме борбата да ја издигнеме нашата земја над нивото на современата цивилизација, што беше волјата на Гази Мустафа Кемал, во духот на националната борба“, рече Ердоган.
Во врска со Газа, турскиот претседател предупреди дека Израел „го тестира нашето трпение со заблуди за ветената земја, вклучително и територијата на нашата земја, со закани за употреба на нуклеарно оружје“.
Во израелските напади врз Газа досега загинаа најмалку 10.812 Палестинци, од кои 4.412 се деца и 2.918 жени. Според официјалните податоци, бројот на загинати во Израел достигна скоро 1.600.
Ердоган, исто така, се осврна на односите меѓу Анкара и ЕУ, потенцирајќи дека тие не се подобруваат бидејќи Блокот има „отворено непријателски став“ кон Туркије.
„Надежта за надминување на стратешкото слепило во ЕУ исчезнува“, рече тој.
