Аеродромот „Истанбул“, најфреквентниот аеродром во Европа и во текот на изминатата недела

АНКАРА (АА) - Аеродромот „Истанбул“ во Туркије остана најфреквентен аеродром во Европа и во периодот од 15 до 21 јули, изјави денес турскиот министер за транспорт и инфраструктура Абдулкадир Уралоглу, јавува Анадолу.

Уралоглу рече дека аеродромот имал просечно 1.485 лета дневно минатата недела, цитирајќи податоци од Европската организација за безбедност на воздушната навигација (Евроконтрол).

Бројката е намалена за 0,5 отсто во однос на претходната недела, покажаа податоците на Евроконтрол.

По него следуваат парискиот аеродром „Шарл де Гол“ со 1.408 лета - пад од 0,4 отсто и аеродромот во Амстердам со 1.401 лет, што е пад од 0,2 отсто во однос на претходната недела.

На неделна основа, сите аеродроми на врвот реализираа повеќе летови отколку во 2023 година, освен аеродромот во Франкфурт кој забележа пад од 1 отсто.

Во рамките на овие први 10, најпогодени аеродроми поради ИТ-прекини беа „iGA Истанбул“ (пад од 6 отсто минатиот петок наспроти тој ден во 2023 година), „Палма де Мајорка“ (пад од 6 отсто) и аеродромот во Франкфурт (пад од 4 отсто).

На 19 јули ажурирањето на софтверот од американската компанија за кибербезбедност „КраудСтрајк“ доведе до масовен ИТ-прекин низ светот на уредите со оперативниот систем Виндоус. Повеќето бизниси беа прекинати, вклучително и транспортот, а над 5.000 лета беа откажани на глобално ниво.

Аеродромот „Анталија“ во турскиот туристички град на Медитеранот е рангиран на осмо место на најфреквентни аеродроми во Европа со 1.036 лета во периодот од 15 до 21 јули.

Велика Британија минатата недела беше најпрометна земја, со реализирани 6.286 лета, меѓу кои и прелети. Следува Шпанија со 5.923 лета и Германија со 5.280 лета во периодот од 15 до 21 јули.

Туркије беше на петто место на најпрометни земји во Европа со 3.959 лета во истиот период.

„Рајанер“ беше најдобра авиокомпанија со 3.549 лета, а „изиЏет“ беше на второ место со 1.784 лета дневно. Трет по просечни летови дневно беше „Туркиш ерлајнс“ со 1.556 лета.

Првите десет авиооператори забележаа благо намалување од 1,1 отсто во бројот на летови во однос на претходната недела, поради ИТ-прекинот.

Најпогодени авиооператори меѓу првите 10 на 19 јули беа „Вуелинг“, кој забележа пад на бројот на летови за 19 отсто во споредба со 2023 година, „КЛМ Груп“ (пад од 17 отсто) и „Виз Ер груп“ (пад од 16 отсто).