Агенција Анадолија упати порака со поддршка до Агенцијата ХИНА и до хрватскиот народ

„Со голема тага ја примив веста за земјотресот во Загреб во кој е оштетена и зградата на Агенцијата ХИНА во Загреб. Во овие тешки моменти АА е со хрватскиот народ и со колегите во пријателската агенција ХИНА“, порача Казанџи

АНКАРА / ЗАГРЕБ

Генералниот директор на Агенција Анадолија, Шенол Казанџи, упати писмо со поддршка до генералната директорка на Новинската агенција ХИНА, Бранка Габриела Војводиќ, до вработените во агенцијата и до граѓаните на Хрватска поради неодамнешниот земјотрес што го погоди Загреб, а во кој е оштетена и зградата во која се наоѓа канцеларијата на оваа новинска агенција.

„Со голема тага ја примив веста дека во земјотресот во Загреб е оштетена и зградата со канцелариите на Агенцијата ХИНА во Загреб. Во овие тешки моменти Агенција Анадолија е со хрватскиот народ, како и со колегите вработени во пријателската агенција ХИНА“, порача Казанџи во писмото со поддршка до ХИНА.

Казанџи им посака брзо закрепнување на повредените во земјотресот.

Тлото на подрачјето на Загреб и околината се тресе во интервали од неделата од 06:24 часот, кога потресот со сила од 5,5 степени по Рихтер предизвика значителна материјална штета и однесе еден живот.