Турскиот министер за правда бара итно ослободување на приведените активисти од флотилата со помош за Газа

ИСТАНБУЛ (АА) - Турскиот министер за правда, Јилмаз Тунч, денес го осуди нападот на Израел врз Глобалната флотила „Сумуд“ што носеше хуманитарна помош за Газа и повика на ослободување на приведените активисти, јавува Анадолу.

Говорејќи на настан во западната област Едрене, Тунч рече дека хуманитарната трагедија во Палестина продолжува.

Тунч нагласи дека светот e сведок на нападот на Израел врз Глобалната флотила „Сумуд“ - мисија насочена кон доставување помош за деца, жени и други ранливи луѓе во Палестина, а наедно и кон разоткривање на кршењата на човековите права пред меѓународната заедница.

Повикувајќи на итно ослободување на притворените активисти, тој рече: „Му нанесовте огромно страдање на народот на Палестина со кршење на меѓународното право и основните човекови права. Продолжувате да извршувате акти на геноцид пред очите на светот.“

Тунч рече дека третманот на Израел кон активистите на Глобалната флотила „Сумуд“ и она што продолжува да го прави во Палестина претставуваат злосторства против човештвото.

„Од 7 октомври 2023 година Израел врши геноцид во Газа, убивајќи жени и деца и продолжува да извршува злосторства против човештвото“, рече Тунч.

Ова не е нешто што започнало пред две или две и пол години. Последните 100 години Израел окупира палестински земји и таму спроведува политика на геноцид.“

Организаторите изјавија дека израелските поморски сили нападнале 42 брода од Глобалната флотила „Сумуд“ од среда вечерта и привеле повеќе од 450 активисти.

Флотилата, која превезуваше главно хуманитарна помош и медицински материјали, исплови кон крајот на август за да ја пробие израелската блокада на Газа.

Последниве години тоа е најголем обид да се стигне до енклавата, која е под блокада речиси 18 години.

Израел дополнително ја заостри блокадата во март, затворајќи ги сите гранични премини и блокирајќи ги храната, лековите и помошта, со што предизвика состојба на глад во Газа.

Израелската армија уби над 66.200 Палестинци, повеќето од нив жени и деца, од октомври 2023 година.