Ekip
01 Јуни 2022•Ажурирај: 02 Јуни 2022
ЛОНДОН (АА) - Курт Зума, фудбалер кој игра за англискиот премиерлигаш Вест Хем Јунајтед, денеска беше осуден на 180 часа општествено корисна работа, откако се изјасни за виновен за клоцање и удирање на својата мачка, јавува Агенција Анадолија (АА).
На 27-годишниот дефанзивец, исто така, му беше забрането да поседува мачки пет години, а му беше изречено да плати речиси 9.000 фунти за судски трошоци.
Зума се изјасни за виновен за два прекршоци според Законот за благосостојба на животните од 2006 година, за предизвикување непотребно страдање на мачките на сослушувањето во Судот на Темза во Лондон минатиот месец.
Инцидентот го снимил братот на фудбалерот Јоан во февруари, кој подоцна го објавил на Снепчет. Исто така, и Јоан е осуден на 140 часа општествено корисна работа.
На снимката се гледа како Курт Зума ја клоца, фрла и удира својата бенгалска мачка, чин што предизвика широкораспространет бес. На снимката, исто така, се гледа како вели „Се колнам дека ќе ја убијам“.
„Двајцата учествувавте во овој срамен и осудувачки чин со оваа мачка милениче. Мора да бидете свесни дека многу млади луѓе се стремат да се угледаат на вас“, рече окружниот судија Сузан Холдам во својата пресуда.
„По инцидентот, Зума го загуби спонзорскиот договор со „Адидас“, како и местото во француската репрезентација и е казнет со 250.000 фунти“, беше кажано на судот.
Двете мачки на Зума беа запленети од полицијата и однесени под грижа на Кралското друштво за спречување на суровост кон животните (RSPCA), каде што останаа.
