По Суперкупот, фудбалерите на Челси и Ливерпул го напуштија Истанбул
Актуелните победници од УЕФА Лигата на шампиони и Лига Европа, Ливерпул и Челси, синоќа на стадионот на Бешикташ „Водафон арена“ го одиграа натпреварот во Суперкупот на Европа
ИСТАНБУЛ (АА) - Фудбалерите на Челси и Ливерпул денеска отпатуваа од Истанбул, каде што синоќа се одигра мечот во Суперкупот на Европа, јавува Anadolu Agency (AA).
Фудбалерите и стручниот штаб на Челси претпладне полетаа за Лондон.
Автобусот, пак, со фудбалерите и стручниот штаб на Ливерпул по пристигнувањето на аеродромот во Истанбул, преминаа на терминалот за пасошка контрола. Потоа полетаа за Велика Британија.
Актуелните победници од УЕФА Лигата на шампиони и Лига Европа, Ливерпул и Челси, синоќа на стадионот на Бешикташ „Водафон арена“ го одиграа натпреварот во Суперкупот на Европа.
Одличното фудбалско шоу од трибините го следеа околу 40.000 гледачи, а за безбедноста на стадионот и околу него беа ангажирани околу 15.000 полицајци.
Интересно е тоа што правдата на теренот во Истанбул ја делеше Французинката Стефани Фрапарт. Тоа е првпат во историјата, жена да суди дуел помеѓу машки тимови во натпреварите на Европската фудбалска федерација. Нејзини асистентки беа Французинката Мануела Ноколоси и Мишел О’Нил од Ирска. Улогата на четврти судија му припадна на најдобриот турски арбитер Џунејт Чакир.
Натпреварот од Суперкупот во Истанбул заврши нерешено - 1:1, по што се играа и продолженија.
Веќе во петтата минута од првото продолжение, фудбалерите на Ливерпул одиграа добра акција која со гол за водство повторно ја реализира Садио Мане.
Водството на Ливерпул траеше само 6 минути, а потоа Жоргињо изедначи со рутинска реализација на пенал.
До крајот на продолжението мрежите мируваа, па победникот се бараше преку удари од 11 метри.
Поголема концентрација и спортска среќа имаа фудбалерите на Ливерпул кои со изведувањето на пенали, со резултат 5:4, се закитија со трофеј од Суперкупот на Европа.
По мечот организирана е спектакуларна церемонија на доделување на пехарот и медали од Суперкупот на Европа.