Шолц: „Не можам да замислам“ апсење на Нетанјаху во Германија

БЕРЛИН (АА) – Германскиот канцелар Олаф Шолц денес изјави дека не очекува израелскиот премиер Бенјамин Нетанјаху да се соочи со апсење во Германија, и покрај меѓународниот налог за негово апсење за воени злосторства во Газа, јавува Анадолу.

На прес-конференција во Берлин, Шолц одговори на прашањето за контроверзната посета на Нетанјаху на Унгарија и дали израелскиот лидер би можел да ја посети германската престолнина без ризик да биде уапсен.

„Разговаравме за ова неколку пати, и не можам да замислам дека би дошло до апсење во Германија“, изјави Шолц за новинарите, без да даде дополнителни детали.

Посетата на Нетанјаху на Унгарија претставува негово прво патување на европско тло откако Меѓународниот кривичен суд (МКС) минатиот ноември издаде налог за негово апсење, обвинувајќи го за воени злосторства во Газа.

Германската Влада, како потписничка на Римскиот статут од 1998 година и негов ратификатор од 2000 година, е законски обврзана да соработува со МКС, вклучително и за извршување на налозите за апсење.

Идниот германски канцелар, конзервативецот Фридрих Мерц, по изборите на 23 февруари изјави дека би сакал да го пречека Нетанјаху во Берлин, и покрај налогот на МКС.

Зборувајќи пред новинарите по телефонскиот разговор со Нетанјаху, кој му честитал за изборната победа, Мерц рече дека разговарале за можен состанок по формирањето на новата влада, што се очекува кон крајот на април.

„Му ветив дека ќе најдеме начини и средства тој да може да ја посети Германија и да замине без да биде уапсен. Мислам дека е целосно апсурдна идејата дека израелскиот премиер не може да ја посети Сојузна Република Германија. Тој ќе може да ја посети Германија“, изјави Мерц.