Шефот на ИАТА: Ќе бидат потребни месеци за да се нормализираат цените на авионско гориво

Ќе бидат потребни месеци за да се нормализираат цените и снабдувањето на гориво за авионите, дури и ако Ормускиот Теснец се отвори и остане отворен, изјави денес шефот на Меѓународната асоцијација за воздушен транспорт (ИАТА), јавува Анадолу.

За време на говорот на Светскиот симпозиум за податоци на ИАТА, во Сингапур, тој истакна дека иако цените на суровата нафта паднаа за околу 15 отсто по неодамнешните соопштенија, за обновување на глобалното снабдување со гориво за авиони и други рафинирани производи е потребно повеќе време.

Блискиот Исток претставува клучен дел од глобалниот синџир на снабдување, што значи дека закрепнувањето нема да се случи за неколку недели и покрај првичните позитивни ефекти врз цените.

Тој потсети дека постои речиси директна корелација помеѓу цената на нафтата и цените на авионските билети и дека прашањето отсекогаш било колку време е потребно за ценовните активности на индустријата да се одразат во реалните приходи.