Чавушоглу: „Нема да дозволиме нови тензии во Босна и Херцеговина“

САРАЕВО (АА) - Мевлут Чавушоглу, министерот за надворешни работи на Република Туркије, изјави дека неговата земја, без какви било наметнувања, ги поддржува сите формати кои се прифатливи за сите актери во Босна и Херцеговина и регионот, во контекст на стабилноста и безбедноста на БиХ, известува Агенција Анадолија (АА).

Во рамките на дводневната официјална посета на Босна и Херцеговина, Чавушоглу денес во Сараево се состана со заменичката на претседавачкиот Совет на министри и министерка за надворешни работи на БиХ, Бисера Турковиќ, со која потпиша Договор за спроведување активности за генерирање приходи од страна на членовите на персоналот на дипломатските претставништва и конзуларни претставништва меѓу Советот на министри на БиХ и Владата на Туркије, како и Меморандум за разбирање меѓу Министерството за надворешни работи на Босна и Херцеговина и Министерството за надворешни работи на Република Туркије за размена на дипломати.

По состанокот и церемонијата на потпишување на билатералните договори, Чавушоглу во своето обраќање пред новинарите изрази задоволство од престојот во Сараево и потсети дека вчера се состанал со реис-ул-улема на Исламската задница во БиХ, Хусеин еф. Кавазовиќ, и високиот претставник на меѓународната заедница во БиХ, Кристијан Шмит. Тој додаде дека го посетил и гробот на Алија Изетбеговиќ, првиот претседател на Р БиХ и присуствувал на церемонијата на доделување дипломи на дипломците на Интернационалниот универзитет во Сараево (IUS).

Чавушоглу најави дека денес ќе се состане и со членот на Претседателството на БиХ, Жељко Комшиќ, и со претседавачот со Претседателството на БиХ, Шефик Џаферовиќ, додека со членот на Претседателството, Милорад Додик, неодамна се состанал во Истанбул.

Тој истакна дека со колешката Турковиќ имал конструктивен состанок на кој зборувале за билатералните и регионалните теми, како и за актуелната ситуација во БиХ.

„Туркије и БиХ имаат длабоко вкоренети историски и културни врски и оваа година се одбележува 30-годишнината од воспоставувањето на дипломатските билатерални односи. Продолжуваме да ја развиваме соработката на политичко, економско и воено поле, како и во други области. Минатата година се доближивме до трговска размена од милијарда долари и верувам дека оваа година тоа ќе го надминеме. Турските компании и нашите институции се многу присутни и вложуваат во БиХ, како што и уважената министерка спомена, тука се ТИКА, а би додал дека и Вакуфската дирекција на Туркије, Институтот Јунус Емре, Управата за турска дијаспора и Турк хавајоллари. Со задоволство можам да кажам дека ќе имаме и многу блиски односи со Министерството за надворешни работи и дека тие односи со денешните договори дополнително се унапредени“, рече Чавушоглу.

Шефот на турската дипломатија рече дека на состанокот разговарале и за одразот на актуелните глобални кризи во регионот. Додаде дека претседателот на Туркије, Реџеп Таип Ердоган, има намера да организира трилатерален самит Туркије, БиХ и Србија и дека српската страна веќе изразила подготвеност.

„Оваа наша посета во пет балкански земји е показател за важноста што ја придаваме на регионалната стабилност. БиХ е клучна во погледот на стабилноста во регионот и затоа не можеме да дозволиме нови тензии во БиХ и сите би требало да се однесуваат одговорно“, порача Чавушоглу.

Турскиот министер порача и дека Туркије ќе продолжи со моќната поддршка за суверенитетот, територијалниот интегритет и стабилноста на Босна и Херцеговина, како и нејзината ориентација кон Европската Унија и НАТО.

„Продолжуваме со реализирање на активностите во насока на јакнење на стабилноста и развојот на БиХ и сметаме дека тоа придонесува и за регионалниот просперитет“, нагласи Чавушоглу.

На прашањето на новинарите да ги коментира медиумските наводи дека на неговиот состанок со Додик во Истанбул на 14 јуни станало збор за идејата за состанок на лидерите на Туркије, БиХ, Србија и Хрватска, Чавушоглу одговори дека Туркије била предводник на иницијативата за воспоставување трилатерални механизми за воспоставување и зачувување на стабилноста на БиХ и на Западен Балкан.

„За доброто на стабилноста и развојот на Босна и Херцеговина, Туркије е подготвена за поддршка и учество во сите билатерални и мултилатерални иницијативи кои се прифатливи за сите страни и постојано ги поттикнуваме страните во тој правец“, рече Чавушоглу.

На прашањето на новинарите истакна дека многу е јасен ставот на Туркије во однос на ситуацијата во БиХ и додаде дека Додик е еден од тројцата членови на Претседателството на оваа земја, без разлика дали тоа некому му се допаѓа или не.

„Ние, без правење разлика, се состануваме со сите членови на Претседателството на БиХ. На ист начин разговараме со сите. Кога во прашање се некои одлуки и чекори што ги направија властите на ентитетот Република Српска во последно време и кога во прашање е зачувувањето на политичкиот и територијалниот интегритет на БиХ, тука нашиот став е секогаш јасен и секогаш на ист начин е изнесен пред сите страни со кои разговараме. Во тој контекст, и на последниот состанок, на Додик му изнесовме јасни и недвосмислени пораки. Како што и пред малку реков, ние зборуваме за состаноци во формати кои се прифатливи за сите страни. Во контекст на стабилноста и безбедноста на БиХ, Туркије без никакви наметнувања ќе ги поддржи сите формати кои сите во БиХ и регионот ќе ги прифатат“, рече Чавушоглу.

Шефот на турската дипломатија вчера во Загреб јасно рече дека сите активности и напори што се вложуваат со цел сочувување на единството, заедништвото, стабилноста и безбедноста на БиХ, во потполност ќе бидат поддржани од Туркије.