Црвениот крст и Црвената полумесечина го осудија израелскиот напад на амбулантното возило во Газа

ЖЕНЕВА (АА) - Меѓународната федерација на Црвениот крст и Црвената полумесечина (МФЦК) денес го осуди израелскиот воздушен напад врз амбулантно возило, во кој загинаа четири палестински медицински лица во централниот дел на Појасот Газа, јавува Анадолу.

Израелски воени авиони вчера нападнаа амбулантно возило во градот Деир ал Балах, при што загинаа четворица членови на палестинската Црвена полумесечина и двајца пациенти.

„Овие смртни случаи се шокантни и целосно неприфатливи. Според меѓународното хуманитарно право, амбулантните возила, здравствените работници и нивните пациенти мора да бидат почитувани и заштитени“, соопшти МФЦК.

Се повикува на „непоколебливо почитување на амблемот на Црвената полумесечина и клучните хуманитарни услуги што ги претставува“.

Според палестинското Министерство за здравство, амбулантните возила и медицинските установи постојано се цел на израелски напади во Појасот Газа.

Израел започна со жестоки напади врз палестинската енклава по прекуграничниот напад на Хамас во кој загинаа околу 1.200 Израелци, според Тел Авив.

Според палестинските здравствени власти, од 7 октомври досега во израелските напади загинати се најмалку 23.357 Палестинци, главно жени и деца, а 59.410 се повредени.

Според Обединетите нации, околу 85 отсто од населението на Газа е раселено, стотици илјади луѓе живеат без храна и засолниште, а на територијата на енклавата влегуваат помалку од половина од камионите со хуманитарна помош отколку пред почетокот на конфликтот.