Централна изборна комисија на Азербејџан: Претседателот Илхам Алиев освои 92 отсто од гласовите

МОСКВА (АА) - Актуелниот претседател на Азербејџан, Илхам Алиев, води на претседателските избори со 92,1 отсто од гласовите, покажуваат податоците на Централната изборна комисија (ЦИК), пренесува Анадолу.

Бројката ја објави изборниот комесар Мазахир Панахов по пребројувањето на 93 отсто од гласовите од претседателските избори во средата.

Независниот кандидат, Захид Оруј, заостана со 2,19 отсто, а по него следува лидерот на Партијата за големо создавање, Фазил Мустафа, со два отсто од гласовите.

Другите кандидати освоија помалку од два отсто од гласовите.

Главна карактеристика на претседателските избори во Азербејџан во 2024 година беше тоа што за прв пат во историјата се одржаа на целата територија на земјата, вклучувајќи го и ослободениот регион Карабах.

„Излезноста во таа област беше една од највисоките во државата. Два часа по почетокот на изборите во регионот гласале околу 30 отсто од граѓаните“, соопшти Изборната комисија.

Изборите ги следеа странски и домашни набљудувачи, како и голем број новинари.