Цената на руската сурова нафта „Урал“ падна за околу 40 отсто на годишно ниво

МОСКВА (АА) - Цената на руската нафта „Урал“ во периодот од јануари до април годинава забележа пад од околу 40 отсто во однос на претходната година, покажуваат официјалните податоци објавени денес, јавува Анадолу.

„Со руската сурова нафта 'Урал' се тргуваше за 51,05 долари за барел во периодот од јануари до април годинава, наспроти 84,68 долари за барел во истиот период минатата година, што претставува годишен пад од 39,7 отсто“, се наведува во соопштението на Министерството за финансии на Русија.

Се додава дека во април годинава е забележан мал пораст на цените на 58,63 долари по барел.

Во декември минатата година, земјите членки на Европската Унија се договорија за гранична цена од 60 долари по барел за извоз на руската сурова нафта што се транспортира по морски пат.

Многу земји кои продолжуваат да купуваат руска нафта, особено Кина и Индија, бараат отстапки од Русија бидејќи ризикуваат прекршување на санкциите.