Холандскиот премиер Руте го повика Израел да го прифати планот за прекин на огнот во Газа поддржан од ОН

БЕРЛИН (АА) - Холандскиот премиер Марк Руте ја поздрави резолуцијата на Советот за безбедност на Обединетите нации (СБОН) за прекин на огнот во Газа и го повика Израел „да го прифати планот“, јавува Анадолу.

Руте рече дека целиот свет „сега очекува од Израел да го прифати она што самите го предложија“ и веднаш да ги прекине своите воени операции во градот Рафа, на југот на Газа.

Советот за безбедност на ОН во понеделникот усвои нацрт-резолуција со која се бара поддршка на предлогот што го најави американскиот претседател Џо Бајден, а кој се состои од три фази и предвидува моментален прекин на огнот во Газа.

Нацртот беше предложен од делегацијата на САД и поддржан од 14 земји членки, додека Русија беше воздржана.

Во усвоената одлука укажано е на дипломатските напори на Египет, САД и Катар, а беше поздравен и предлогот во три фази што Бајден го изнесе на 31 мај.

Руте нагласи дека планот за прекин на огнот презентиран од САД всушност доаѓа од самиот Израел, иако израелските лидери досега јавно не го поддржале.

„Би рекол дека тоа е повеќе израелски предлог за прекин на огнот отколку американски. Понекогаш Израелците не се сосема сигурни што предложиле, но мислам дека на крајот тоа е нивен предлог, што го прави уште подобар“, рече холандскиот премиер.

Тој истакна дека „бил многу среќен кога дознал дека Хамас реагирал многу позитивно на резолуцијата на Советот за безбедност на ОН.

„Сега за нас е клучно да имаме целосен прекин на огнот што е можно поскоро“, рече Руте.

Тој, исто така, го осуди нападот на Хамас на 7 октомври, потврдувајќи дека Израел има право да се брани, и истакна дека Тел Авив има меѓународни обврски и дека треба да дејствува во рамките на меѓународното право.

Израел од 7 октомври минатата година врши континуирани напади врз Појасот Газа, во кои досега се убиени над 37.160 Палестинци, главно жени и деца, а околу 84.800 се повредени.

Холандскиот премиер изрази сериозна загриженост за катастрофалната хуманитарна ситуација во Рафа, повторувајќи го својот повик за итен прекин на огнот.

„Се разбира, многу сме загрижени за ситуацијата во Рафа, бидејќи таму живеат 1,5 милиони луѓе, а секоја воена операција таму може да доведе до огромна загуба на животи. Не заборавајте што рече Меѓународниот суд на правдата, а тоа е дека операцијата во Рафа мора веднаш да заврши, мора да заврши сега. Тоа му го кажав и на Бенјамин Нетанјаху“, изјави Руте за АА.

Тој наведе дека земјите од ЕУ го поддржуваат планот за прекин на огнот во Газа поддржан од ОН, и очекуваат дека и Израел и Хамас ќе ги преземат неопходните чекори за негово спроведување.

„ЕУ не секогаш размислуваше како едно за ова, но мислам дека овде, за овој конкретен мировен предлог, ЕУ е многу усогласена и сложна“, рече Руте.

Тој ги повика Израел и Хамас да го спроведат овој мировен предлог.