Alaattin Doğru
26 Септември 2020•Ажурирај: 28 Септември 2020
ПАРИЗ (АА) - Во Франција е започната истрага против весниците што ја објавија содржината на телефонскиот разговор меѓу рускиот претседател, Владимир Путин, и францускиот претседател, Емануел Макрон, јавува Агенција Анадолија (АА).
Во делот за прашања и одговори на веб-страницата на француското Министерство за надворешни работи, новинар побара мислење од Министерството за објавувањето на деталите во француските весници за телефонскиот разговор меѓу Путин и Макрон во врска со наводното труење на рускиот опозиционер Алексеј Навални.
Во писмениот одговор на прашањето, даден од Министерството, се нагласува: „Протекувањето доверливи документи за внатрешните прашања е неприфатливо. Затоа се воздржуваме од коментари. Истрагата продолжува. Претседателот (Макрон) има за цел да ги реши сите прашања во врска со Русија, особено оние што влијаат на нашата безбедност, преку дијалог и искреност, така ќе продолжи.“
Рускиот печат пишува дека истрагата е започната против весникот „Ле Монд“ („Le Monde“).
Путин и Макрон остварија телефонски разговор на 14 септември, а весникот „Ле Монд“ („Le Monde“) во веста тврди дека Путин во разговорот нагласил дека Латвија, каде што живеат тие што ја развиле хемикалијата „Новичок“, е вклучена во проблемот „Навални“.
За време на враќањето од сибирски Омск во Москва на 20 август, 44-годишниот Навални остана без свест во авионот, а по принудното слетување беше хоспитализиран во Омск, под сомнение за „токсично труење“ со супстанција измешана во неговиот чај.
