Selen Temizer
01 Јули 2022•Ажурирај: 02 Јули 2022
БРИСЕЛ (АА) - Урсула фон дер Лајен, претседателката на Комисијата на Европската Унија (ЕУ), наведе дека Украина има долг пат пред да стане членка на ЕУ, но дека ќе продолжат да ја поддржуваат земјата онолку колку што е потребно, пренесува Агенција Анадолија (АА).
Фон дер Лајен се обрати до украинскиот Парламент преку видео линк, откако Украина го доби статусот на земја кандидат.
Наведувајќи дека Русија продолжува да ги убива Украинците, да ги бомбардира градовите и да им ја краде пченицата, Фон дер Лајен рече: „Ќе продолжиме да ја поддржуваме Украина, без разлика колку долго ќе трае. Нема да одмораме додека вие не победите.“
Фон дер Лајен, упатувајќи пофалби за континуираното функционирање на државата и демократските институции дури и за време на војната, рече: „Вашето барање за членство во ЕУ дојде неколку дена по руската окупација. Ни ги дадовте потребните информации во рекордно време.“
„Денеска е ден за славење на овој историски пресврт и победата на решителноста. Реконструкцијата на Украина и процесот на членство во ЕУ ќе одат заедно“, рече Фон дер Лајен.
Лајен, исто така, додаде:
„Имам многу едноставна порака. Имате долг пат пред вас, но ЕУ ќе биде со вас на секој чекор од патот, од овие темни денови на војната, па сѐ до моментот кога ќе станете членка. Верувам во европската иднина на Украина. Единствената причина за тоа е решителноста на Украинците.“
Европскиот совет ѝ додели на Украина статус на земја кандидат на лидерскиот Самит на 23-24 јуни.
- „Можеме да почнеме да извезуваме струја во ЕУ“
Претседателот на Украина, Владимир Зеленски, потсети дека неговата земја го добила статусот земја кандидат за рекордно време од 115 дена.
Потсетувајќи дека Украина е вклучена во електричната мрежа на ЕУ, Зеленски рече: „Сега можеме да започнеме со извоз на електрична енергија во ЕУ.“
Меѓу другото, Зеленски истакна дека има барања од ЕУ како што се царински режим без визи, либерализација на патниот транспорт, укинување на таксите за роаминг, пристапување кон дигиталниот пазар на ЕУ и индустриски безвизен режим.
