УНРВА: Уште половина милион раселени Палестинци, просторот за живеење во Газа се намалува поради израелските наредби

АНКАРА (АА) - Речиси 500.000 Палестинци во Газа биле принудно раселени во минатиот месец поради континуираните напади на израелската армија, соопшти денес Агенцијата за палестински бегалци на Обединетите нации (УНРВА), јавува Анадолу.

„Во текот на минатиот месец речиси половина милион луѓе во Газа се раселени“, се вели во соопштението на УНРВА.

„Наредбите за раселување издадени од израелската војска им оставаат на Палестинците помалку од една третина од територијата на Газа за живеење“, предупредува агенцијата, нагласувајќи дека „преостанатиот простор е уништен, небезбеден и едвај соодветен за живот“.

УНРВА додава дека „пренатрупаните засолништа се во ужасна состојба, давателите на услуги едвај функционираат, а последните ресурси се на работ на исцрпување“.

Од почетокот на офанзивата во октомври 2023 година во бруталните напади на Израел врз Газа се убиени речиси 51.400 Палестинци, повеќето жени и деца.

Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.