ИСТАНБУЛ (АА) - Украина соопшти дека нејзината делегација и американската страна постигнале „заедничко разбирање“ околу основните услови на предложениот мировен план на САД, по разговорите одржани во Женева, јавува Анадолу.

Секретарот на Советот за национална безбедност и одбрана, Рустем Умеров, во објава на американската социјална мрежа Фејсбук истакна дека Киев ги цени „продуктивните и конструктивни“ средби што се одржаа во неделата меѓу украинските и американските претставници, како и напорите на американскиот претседател Доналд Трамп да се стави крај на војната.

„Нашите делегации постигнаа заедничко разбирање за клучните точки од договорот дискутиран во Женева“, рече Умеров, додавајќи дека Украина сега смета на поддршка од европските партнери во наредните чекори.

Тој нагласи дека Киев очекува да се организира и посета на украинскиот претседател Владимир Зеленски во САД „во најран можен термин во ноември“, со цел да се финализираат последните детали и да се постигне договор со Трамп.

Претставници од САД, Украина и европските сојузници во неделата се сретнаа во Женева за да ја разгледаат американската иницијатива за ставање крај на повеќе од три и полгодишната војна.

Трамп претходно изјави дека предложениот американски план нема да биде негов „финален предлог“, со оглед на реакциите и загриженоста што ја предизвика во Киев и кај сојузниците.

Зеленски синоќа изјави дека по одржаните преговори, планот, кој првично имал 28 точки, сега содржи „помалку точки“ и „многу од вистинските елементи“.

Истиот ден, помошникот на рускиот претседател, Јуриј Ушаков, соопшти дека се очекува САД „наскоро“ да ѝ се обратат на Москва за да го разгледаат планот, но истакна дека засега нема конкретни договори за такви разговори.

Тој потврди дека Русија е запознаена со една верзија од американскиот предлог која се усогласува со договореното на самитот меѓу Трамп и рускиот претседател Владимир Путин во Алјаска претходно оваа година.